Elordada baǵdarlamalaýdan álem chempıonatynyń fınaldyq kezeńi bastaldy
ASTANA. KAZINFORM – Senat tóraǵasy Máýlen Áshimbaev Qazaqstan sporttyq baǵdarlamalaý federatsııasynyń uıytqy bolýymen Astanada ótip jatqan 48-shi International Collegiate Programming Contest (ICPC) álem chempıonatynyń ashylý rásimine qatysty.
Palata spıkeri bedeldi saıystyń fınaldyq kezeńine qatysýshylarǵa iltıpat bildirip, tsıfrlandyrý jáne IT-salasy Qazaqstanda ulttyq deńgeıdegi basymdyqqa ıe ekenin aıtty. Qazirgi tańda elimizde IT-mamandar daıarlaýǵa jáne baǵdarlamalaý mamandyǵyn oqytatyn ýnıversıtetterdi damytýǵa aıtarlyqtaı ınvestıtsııa salynyp, memleket tarapynan úlken qoldaý kórsetilip otyrǵany da sóz boldy.
«Prezıdentimiz Qasym-Jomart Kemeluly Toqaev tsıfrlandyrý, ІT, jasandy ıntellektti damytý jáne ınnovatsııalardy engizý máselelerine únemi basa mán berip keledi. Qazaqstanda startaptarǵa qoldaý kórsetý jáne ozyq tehnologııalardy engizý baǵyty da júıeli jolǵa qoıylǵan. Elimizde IT-habtar men tehnologııalyq ortalyqtar qurylyp jatyr. Osy saıysqa Qazaqstandaǵy jetekshi tehnıkalyq joǵary oqý oryndarynyń bes komandasy el namysyn qorǵaıdy», - dedi Máýlen Áshimbaev.
Sondaı-aq Senat spıkeri baǵdarlamalaý adamzattyń ámbebap tili ekenin, ol túrli salanyń damýynda mańyzdy ról atqaratynyn aıtty.
«Sporttyq baǵdarlamalaý jaı báseke ǵana emes. Bul – synı oılaýdy damytýǵa, kásibı daǵdylardy jetildirýge, kúrdeli mindetterdi oryndaýdy úırenýge jáne komandamen tıimdi jumys isteýge jol ashatyn biregeı múmkindik. Mundaı qabiletter kez-kelgen salada tabysqa jetýdiń negizi ekeni anyq. ICPC qory álem boıynsha jastarǵa jańa múmkindikter berý jáne tsıfrlyq teńsizdikti eńserý jolynda mańyzdy mıssııa atqaryp keledi. Sol úshin rızashylyǵymyzdy bildiremiz. Aldaǵy ýaqytta da ISPC qorymen yntymaqtastyǵymyz nyǵaıyp, birlesip nátıjeli jumys isteımiz dep senemin», - dedi Máýlen Áshimbaev jarysqa qatysýshylarǵa sáttilik tilep.
Sonymen qatar Palata tóraǵasy ICPC qorynyń atqarýshy dırektory Ýılıam Paýchermen Qazaqstanda sporttyq baǵdarlamalaýdy odan ári damytý perspektıvalaryn talqylady. Atap aıtqanda, qatysýshylardy daıarlaý, jattyqtyrýshylardyń biliktiligin arttyrý, joǵary oqý oryndaryn qajetti ınfraqurylym jáne materıaldyq-tehnıkalyq turǵydan jabdyqtaý, sondaı-aq, basqa da ózekti máseleler sóz boldy. Ýılıam Paýcher óz tarapynan Máýlen Áshimbaevqa Qazaqstannyń baǵdarlamalaýdy qoldaǵany jáne elde keńinen dáriptegeni úshin rızashylyǵyn bildirdi.
Aıta keteıik, International Collegiate Programming Contest (ICPC) – álemdegi 110 eldiń úzdik joǵary oqý oryndarynyń basyn qosatyn sporttyq baǵdarlamalaý boıynsha eń kóne, eń iri jáne eń bedeldi jarys. Astanada 15-20 qyrkúıek aralyǵynda ótetin 48-shi chempıonattyń fınalyna álemniń ár túkpirinen 600 baǵdarlamalaýshy qatysyp jatyr.
Fınaldyq kezeńde Qazaqstan atynan Nazarbayev University, Halyqaralyq aqparattyq tehnologııalar ýnıversıteti, Astana ІT University jáne Qazaqstan-Brıtan tehnıkalyq ýnıversıteti óner kórsetedi. Buǵan deıin Halyqaralyq aqparattyq tehnologııalar ýnıversıtetiniń komandalary ICPC World Finals álemdik fınalyna 5 ret shyǵyp, Soltústik Eýrazııa aımaǵy boıynsha úzdik 12 joǵary oqý ornynyń qatarynan kóringen bolatyn. Byltyr ICPC álem chempıonatynda otandasymyz Batyr Sardarbekov Qazaqstan tarıhyndaǵy alǵashqy «altyndy» jeńip aldy.
