Elordada Azııa elderi qalamgerleriniń І forýmy ótedi
Bul týraly Qazaqstan Jazýshylar odaǵynyń tóraǵasy Ulyqbek Esdáýlet ortalyq kommýnıkatsııalar qyzmetinde ótken brıfıngte aıtty.
«Áýelde bul forýmǵa japonııalyq, túrkııalyq Nobel syılyǵynyń laýreattary shaqyrylǵan. Ókinishke oraı, olar kele almady. Esesine Ońtústik Koreıa, Katar jáne Túrkııa elderinen 3 nomınant kele jatyr. Qurlyqta 45 memleket bar. Sonyń 44-inen jazýshy shaqyrǵanbyz. Qazir 35 elden 80-ge jýyq jazýshy kele jatyr. Uıymdastyrý jumysyna memleket ózi járdem berip, qoldaý kórsetip otyr. Memlekettik hatshy Marat Tájın myrza sharany uıymdastyrýǵa tikeleı atsalyssa, Memleket basshysy forýmnyń ashylýyna qatyspaqshy. Osynyń ózi ádebıetke degen oń kózqaras qalyptasqanyn kórsetedi», - dedi Ulyqbek Esdáýlet.
QR Mádenıet jáne sport vıtse-mınıstri Nurǵısa Dáýeshov atalmysh forýmdy 3 jylda bir ret ótkizý usynylatynyn aıtady.
«Azııa qalamgerlerine osy forýmdy 3 jyl saıyn ártúrli memlekette ótkizýdi usynbaqpyz. Sondaı-aq, Azııa jazýshylary komıtetin quryp, shtab páterin Nur-Sultan qalasynda ashýdy josparlap otyrmyz. Aýdarma isine, sonyń ishinde qazaq avtorlaryn Azııa tilderine aýdarý boıynsha da naqty usynystarymyz bar. Forým barysynda osy taqyryptarda pikir almasyp, kelissózder júrgizemiz», - dedi mınıstrlik ókili.
Qazaqstan Jazýshylar odaǵy tóraǵasynyń orynbasary Aqberen Elgezektiń aıtýynsha, 2 kúnge sozylatyn shara barysynda paıdaly dárister men ashyq pikirtalastar uıymdastyrý josparlanǵan.
«Forým jumysy 3 kúnge sozylady. Erteń plenarlyq otyrysy ótedi. Eki bólimde 11 spıker baıandama oqıdy. Kelesi kúni TED.9 formatynda arnaıy shara ótedi. Onda 10 spıker dáris oqyp, erkin formatta suhbattasady. Sondaı-aq, Abaı kóshesiniń boıynda «Qalamgerler alleıasy» ashylady. Shara aıasynda Ortalyq Azııa qalamgerleriniń kezdesýi ótedi. Onda Uly Jibek joly boıyndaǵy ádebıettiń bolashaǵy týraly aıtyldy. Forým sheńberinde jas Azııa qalamgerleriniń kezdesýi de josparlanǵan», - deıdi ol.
QR Prezıdenti ákimshiligi men QR Mádenıet jáne sport mınıstrliginiń qoldaýyman ótetin shara 4-6 qyrkúıek kúnderine josparlanǵan. Forýmǵa Nobel syılyǵynyń nomınanttary, Býker jáne ASEAN syılyqtarynyń laýreattary, jazýshylar odaqtary men qaýymdastyqtarynyń tóraǵalarynan quralǵan 90 qonaq keledi degen jospar bar.
