Elordada «Azamattyq alańnyń» birinshi otyrysy ótti

NUR-SULTAN. QazAqparat – Elordada «Azamattyq alań» pikirtalas alańynyń birinshi otyrysy ótti, dep habarlaıdy QazAqparat tilshisi.

«2017 jyly Ortalyq sarapshylyq keńes qurylǵan bolatyn, Keńes músheleri 1 500-den astam sarapshylyq qorytyndy men 215 sarapshylyq usynys ázirledi. Otyrys barysynda Qazaqstandaǵy qoǵamdyq sanany jańǵyrtý jónindegi ulttyq komıssııa janyndaǵy Ortalyq sarapshylyq keńes qyzmetiniń qorytyndysyn talqylaıtyn bolamyz», - dedi jıyndy ashqan Aqparat jáne qoǵamdyq damý vıtse-mınıstri Ǵabıdolla Ospanqulov.

Óz kezeginde Ortalyq sarapshylyq keńes tóraǵasy, L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov jumysty uıymdastyrý barysynda týyndaǵan qıyndyqtarǵa qaramastan keńes músheleri baǵdarlamanyń barlyq baǵyttary boıynsha tyńǵylyq is atqarǵandyǵyn basa aıtty. Sonymen qatar sarapshylyq alań qurylǵandyǵyn atap ótti.

«Keńes músheleri 100-den astam saraptamalyq usynym berdi. Baǵdarlamanyń tujyrymdamalyq ıdeıasyn túsindirý maqsatynda keńes músheleri dárister oqyp, uıymdyq jumystar júrgizdi. Aı saıyn ortalyq jáne óńirlik keńesterde «Sarapshy kúni» aktsııasy ótkizildi. Biz «100 jańa oqýlyq», «Qazaqstannyń sakraldy geografııasy», «Týǵan jer» arnaýly jobalaryn tabysty júzege asyrýǵa járdemdestik», - dedi Erlan Sydyqov.

Otyrysqa qatysýshylar shyǵys kúntizbesi boıynsha jańa jyldy toılaýǵa aıryqsha nazar aýdaryp, ony 14-22 naýryz aralyǵynda atap ótýdi usyndy. Osy rette Aqparat jáne qoǵamdyq damý vıtse-mınıstri Ǵabıdolla Ospanqulov keńes músheleriniń Naýryz meıramyn toılaýǵa qatysty barlyq usynystary qaperge alynatyndyǵyn aıtty.

Bıyl «Rýhanı jańǵyrý» baǵdarlamasy aıasynda azamattyq qoǵammen barynsha tyǵyz baılanysty qamtamasyz etý úshin Ortalyq sarapshylyq keńes ataýyn Qazaqstannyń qoǵamdyq damý ınstıtýty bazasyndaǵy «Azamattyq alań» pikirtalas alańy dep ózgertý týraly sheshim qabyldanǵan.

Atalǵan alańnyń negizgi maqsaty – «Rýhanı jańǵyrý» baǵdarlamasyn júzege asyrýǵa halyqty barynsha belsendi tartý.