Elordada ata-analar arasynda Pfizer vaktsınasyna qatysty saýalnama júrip jatyr

NUR-SULTAN. QazAqparat – Pfizer vaktsınasyn balalarǵa qandaı jaǵdaıda salmaý kerek? Bul týraly qalalyq qoǵamdyq densaýlyq saqtaý basqarmasynyń balalar densaýlyǵyn qorǵaý bóliminiń basshysy Aıjan Amangeldıeva aıtty, dep habarlaıdy QazAqparat tilshisi.

«Eger balany tekserý barysynda dáriger sozylmaly aýrýlardyń asqynýyn anyqtasa, nemese temperatýra kóterilse jáne vaktsına quramyna kiretin komponentterge allergııa bolsa - munyń barlyǵy vaktsınatsııaǵa qarsy kórsetilimderge jatady», - dedi basqarma ókili.

Mamannyń sózine qaraǵanda, búginde elorda mektepterinde saýalnama júrgizilip jatyr. Osy saýalnamanyń qorytyndysy boıynsha vaktsına qajetti mólsherde taratylady.

«Saýalnamada «Balańyzdyń ekpeni qaıda alǵanyn qalaısyz: mektepte me, álde emhanada ma» degen suraq bar. Sonymen qatar, «Balańyzǵa ekpe qalaı salǵanyn kórigińiz kele me, bul protseske qatysasyz ba», - dep suraımyz. Eger «Iá» dep jaýap berse, onda ata-analar balany vaktsınalaý protsesin kórý úshin mektepterge jiberiledi», - dedi Aıjan Amangeldıeva.

Sonymen qatar, ol elordanyń bilim oshaqtarynyń oqýshylardy Pfizer vaktsınasymen ımmýndaýǵa daıyndyǵy baqylaý alynǵanyn atady.

«Vaktsınatsııa aldynda Densaýlyq saqtaý basqarmasynyń qyzmetkerleri mektepterde monıtorıng júrgizip, medıtsınalyq kabınetterdi tekseredi. Vaktsınatsııa úshin barlyq qajetti jaǵdaılar jasalǵan», - dedi basqarma ókili.