Elordada «Ásker Medıa-2019» áskerı jýrnalıstıka salasyndaǵy júlde tabys etiledi

NUR-SULTAN. QazAqparat – QR Qorǵanys mınıstrligi bıyl Qarýly Kúshterdiń tynys-tirshiligin jarııalaýda úzdik bolǵan otandyq jáne sheteldik jýrnalıster men blogerlerdiń esimderin ataıdy, dep habarlaıdy atalǵan vedomstvonyń baspasóz qyzmeti.

Áskerı jýrnalıstıka salasyndaǵy dástúrli «Ásker Medıa-2019» syılyǵyn tabystaý 29 qarashada ótedi. 12 konkýrstyq nomınatsııada úzdikter anyqtalady. Atap aıtqanda, teledıdar, radıo, baspa jáne ınternet BAQ-tarda, sonymen qatar respýblıkalyq jáne aımaqtyq deńgeılerde, sheteldik BAQ-tardaǵy úzdik materıaldar, áskerı taqyrypty baıandaıtyn úzdik bloger, sondaı-aq fotojumystar men arnaıy joba.

Áskerı jýrnalıstıka salasyndaǵy «Ásker Medıa» júldesi – bul áskerı taqyrypty jarııalaýda óz úlesterin qosyp júrgen jýrnalıster men blogerlerdi qoldaý úshin Qazaqstan Qorǵanys mınıstrligi qurǵan biregeı alań.

Ony qurýdaǵy basty ıdeıa – bul qorǵanys vedomstvosymen belsendi jáne tıimdi ózara is-qımyl jasaıtyn buqaralyq aqparat quraldarynyń sheńberin keńeıtý, Qazaqstandaǵy áskerı jýrnalıstıkany damytý, jýrnalıster men blogerlerdi, sondaı-aq osy saladaǵy laıyqty shyǵarmashylyq jumystardy kótermeleý, televızııalyq, baspa jáne ınternet BAQ-pen birlesken medıa-jobalardy iske asyrý, elimizdiń Qarýly Kúshterine qoǵamnyń nazaryn aýdarý.

Áskerı jýrnalıstıka salasyndaǵy «Ásker Medıa» júldesi bıyl úshinshi ret ótedi. Ol mass-medıa ókilderin qoldaý, yntymaqtastyq, dıalog jáne tájirıbe almasý úshin platformaǵa aınalyp, halyqaralyq mártebege ıe.