Elordada árbir ekinshi qylmys beınekamera kómegimen ashylady

ASTANA. KAZINFORM – Elordada baǵdarshamdardyń 40%-y avtomatty rejımde jumys isteıdi. 2026 jyly bul kórsetkish 82%-ǵa jetedi. Qaladaǵy jańashyldyqtar týraly Astana ákimi Jeńis Qasymbek aıtyp berdi. 

Astana ákiminiń sózinshe, qalanyń ıntellektýaldy kólik júıesi belsendi damyp keledi. 2027 jylǵa qaraı qalada kólik basqarýdyń úzdik álemdik tájirıbege saı tolyqqandy júıesi qurylmaq. 

– Qalada Presight AI kompanııasymen birlese Smart City jobasy iske qosyldy. Qaýipsizdik pen jyldam áreket etý úshin beıneanalıtıkasy bar 20 myń kamera ornatylyp jatyr. Qazir árbir ekinshi qylmys beınekameralar arqyly ashylady, - dedi J. Qasymbek Ortalyq kommýnıkatsııalar qyzmetinde ótken brıfıngide. 

Intellektýaldy kólik júıesi men SMART city qalany basqarýdyń tsıfrlyq platformasyna kiredi. Bul turǵyndar joldardaǵy júktemeni azaıta otyryp, yńǵaıly, jyldam jáne qaýipsiz qozǵala alatyn ekojúıeni jasaqtaýǵa múmkindik beredi. 

Óz kezeginde Jeńis Qasymbek Astanadaǵy jeńil relsti kólik (LRT) júıesi aldaǵy 1-2 aıda iske qosylatynyn tilge tıek etken edi. 

Qarasha aıynda elordadaǵy halyq sany 1,6 mıllıon adamnan asty. Buǵan deıin Jeńis Qasymbek qalanyń ınfraqurylymy qalaı jetildiriletinin aıtqan bolatyn.