Elordadaǵy AOK qurlyqtyq sportshylar forýmy aıaqtaldy
ASTANA. KAZINFORM – Elimizdiń bas qalasynda ótken Azııa Olımpıadalyq keńesiniń (AOK) VI Qurlyqtyq sportshylar forýmy aıaqtaldy. Іs-shara Olympic Solidarity baǵdarlamasy aıasynda uıymdastyryldy.
Forýmnyń ekinshi kúninde qatysýshylar sporttaǵy ádildik pen qaýipsizdik taqyryptaryna qatysty ózekti máselelerdi talqylady.
Jarys nátıjelerin manıpýlıatsııalaýdyń aldyn alý jónindegi sessııany AOK Sportshylar komıssııasy tóraǵasynyń orynbasary Shıva Keshavan, AOK-niń Sportshylarmen jumys departamentiniń menedjeri Djamıang Namgıal jáne Qazaqstan Ulttyq Olımpıadalyq komıteti Sport departamentiniń jetekshi menedjeri Aıym Jetibaeva júrgizdi.
Forýmnyń kelesi bólimi antıdopıng máselesine arnaldy. AOK Antıdopıng departamenti men Dúnıejúzilik dopıngke qarsy agenttik (WADA) ókilderi tyıym salynǵan preparattardy qoldanýdy baqylaý salasyndaǵy jańalyqtarmen bólisti. Atap aıtqanda, Ombuds Anti-Doping baǵdarlamasy tanystyryldy. Sodan keıin qatysýshylar toptyq talqylaý ótkizdi.
– Eki kún ishinde túrli taqyryptaǵy kezdesýlerge qatystyq. Olar resmı dáristen góri erkin formatta ótti. Sportshylarǵa mańyzdy kóptegen máseleler jaıly tyńdadyq. Mysaly, sporttaǵy qaýipsizdik talaptary men sportshylarǵa beriletin múmkindikter týraly tolyǵyraq málimet aldyq. Antıdopıng taqyrybyna da tereń toqtaldyq. Tájirıbesimen bólisken sportshylardyń áńgimeleri erekshe áser qaldyryp, kókjıegimizdi keńeıtti. Barlyq sessııa paıdaly boldy. Endi alǵan bilimimizdi durys maqsatta qoldaný ǵana qaldy, - dedi Gonkong UOK Sportshylar komıssııasynyń ókili Endjel Hıý In Vong.
Forýmnyń ekinshi kúni Azııada qaýipsiz sport ortasyn qalyptastyrý máselesine arnaıy nazar aýdaryldy. AOK sarapshylary men sportshylardy qorǵaý jónindegi Azııa jelisiniń ókilderi Sabına Fakhýrı, Hera Lıý, Sıaırah Latıf jáne Roýz Lantıkse zorlyq-zombylyqtyń aldyn alý tásilderin tanystyryp, tájirıbesimen bólisti. Sondaı-aq Sportshylar komıssııasynyń qaýipsiz orta qalyptastyrýda atqaratyn rólin atap ótti.
– Búgin Astanada ótken eki kúndik AOK Qurlyqtyq sportshylar forýmy óz máresine jetti. Shara óte joǵary deńgeıde uıymdastyryldy. Qazaqstan UOK forýmdy joǵary deńgeıde ótkizý úshin barlyq jaǵdaıdy jasady.
Azııa sportshylary eki kún boıy pikir almasyp, bilimin ortaǵa salyp, toppen jumys istedi. Talqylanǵan taqyryptar óte mańyzdy ári qatysýshylar úshin de paıdaly. Osy tusta óz sessııalaryn joǵary deńgeıde júrgizgen spıkerlerdi erekshe atap ótkim keledi.
Forýmnyń nátıjesine kóńilimiz toldy. Sharany uıymdastyrýǵa úles qosqandarǵa qonaqjaılyǵy úshin, sportshylarǵa belsendi qatysqany úshin alǵys aıtamyz, - dep túıindedi Olympic Solidarity baǵdarlamasy dırektorynyń orynbasary Olıve Nıamkı.
Aıta keteıik, eki kúndik sharaǵa Azııanyń 42 Ulttyq Olımpıadalyq komıtetinen, Halyqaralyq Olımpıadalyq komıtetten jáne AOK basshylyǵynan 120-dan astam delegat qatysty.
– Qurlyqtyq forýmnyń Astanada ótýi – Qazaqstan úshin de, búkil Azııa sport qaýymdastyǵy úshin de mańyzdy shara. Halyqaralyq seriktesterdiń senimin joǵary baǵalaımyz jáne tájirıbe men bilim almasýǵa múmkindik bergen ortanyń Astanada qalyptasqanyna qýanyshtymyz. Bul Azııadaǵy Olımpıadalyq qozǵalystyń damýyna jáne nyǵaıýyna septigin tıgizedi, - dedi Qazaqstan UOK prezıdenti Gennadıı Golovkın.
Sondaı-aq forým aıasynda «Aıchı-Nagoıa 2026» Azııa oıyndaryn nasıhattaýǵa arnalǵan Fun Run sımvoldyq júgirý sharasy uıymdastyryldy.
Buǵan deıin Astanada AOK qurlyqtyq sportshylar forýmy bastalǵanyn jazǵan edik.