Elordada alǵash ret erekshe jandar teatry ashyldy
«Qanattylar» ınklıýzıvti teatry bıyl qańtar aıynda resmı túrde tirkeldi. Al bul teatrdy ashý tujyrymdasy men negizi 2018 jyly qolǵa alyndy. Sol jyly elorda kúnine oraı Nur-Sultan qalasynda ınklıýzıvti teatrlardyń halyqaralyq festıvali ótti. Atalǵan festıvalge kórshi Reseı men Ýkraınadan birneshe teatr keldi. Olardyń negizi áride qalanǵan jáne quramy da úlken. Sodan keıin bizde de nege ınklıýzıvti teatr ashpasqa degen oı keldi. Árıne keıbir óńirlerde qoǵamdyq birlestikter janynan kishigirim ujym bolyp qurylyp nemese úıirme retinde jumys istep jatqan ınklıýzıvti shyǵarmashylyq toptar bar. Biraq memlekettik deńgeıde erekshe jandar teatry joq. Sondyqtanda bizdiń teatrdy Qazaqstanda alǵash qurylǵan ınklıýzıvti teatr dep aıta alamyn, - dedi teatr jetekshisi Arnur Ysqaqov.
«Qanattylar» ınklıýzıvti teatry elordadaǵy «Jastar» teatrynyń janynan ashylyp otyr. Jáne búginde teatrda qyzý daıyndyq jumysy júrip jatyr.
«Qańtardan búginge deıin ártisterdi qabyldaý, qoıylymǵa daıyndyq jumysy júrip keledi. Kútimdi talap etetin jandarmen jumys isteýdiń ózindik ereksheligi bar. Taǵy bir aıtyp ótetin jaıt, olar kásibı ártister emes. Olardyń sahnada óner kórsetýge úıretý, sóıleý máneri, kópshilik aldynda ózin ustaı bilý baǵytynda keń kólemdi jumys atqarylyp jatyr. Bilim-biliktilikti arttyrý maqsatynda elorda jáne Almatydaǵy óner oqý oryndarymen kelisimge kelip, bizdiń ártisterdi kásıbı túrde daıarlaý josparymyz bar. Kásibı bilim óte mańyzdy», - deıdi ol.
Erekshe teatrdyń 20 shaqty ártisi bar. Onyń qatarynda 8 estý qabileti nashar jan, 5 arbadaǵy jan, 3 kórý qabileti tómen jáne 2 DTsP-men (balalardyń tselebraldy sal aýrýy) dıagnozy bar erekshe ártis. Sondaı-aq, sýrdo aýdarmashy mamany bar.
«Ártisterdi tańdaýda kastıng uıymdastyryp, aıryqsha irikteýden ótkizdik deı almaımyn. Bastysy balalar men eresekterdiń qabileti men yntasynyń bolýy. Jáne buryn-sońdy sahnaǵa shyǵyp óner kórsetip júrgen jandardy tańdap aldyq. Qoıylymǵa kelsek, bizdiń aldymyzda eki tańdaý turdy, biri daıyn spektakldi ymdaý tiline aýdaryp sahnalap shyǵý, ekinshi óz qoıylymymyzdy ázirleý. Óner oshaǵymyzdyń resmı shymyldyǵyn ashatyn spektakldi teatrymyzdyń ataýymen «Qanattylar» dep atadyq. Teatrdyń ashylýyna sanaýly kún qaldy, daıyndyq qyzý júrip jatyr. Aldaǵy ýaqyttaǵy qoıylymdarymyzda ómirmen baılanysty, ómirden alynǵan jaıttarmen baılanysty bolmaq. Bizdiń maqsat – qarapaıym adam bolsyn, erekshe adamdy bolsyn yntalandyrý, jigerlendirý», - dedi A. Ysqaqov.
Sondaı-aq, teatr jetekshisi aıryqsha jandarmen jumys isteýdiń ereksheligine toqtalyp ótti.
«Árıne bastapqy kezde ońaıǵa soqqan joq. Ár jannyń ózindik ereksheligi bar, ásirese ol daıyndyq kezinde baıqaldy. Mysaly, daıyndyq kezinde bir ártistiń qulaǵy nashar estise, ekinshiniń kózi kórmeıdi. Osy tusta árqaısysymen jeke túrde jumys isteý kerek. Keıde ártisterimizdiń aýyryp qalatyn jaǵdaıda da boldy. Taǵy bir másele kólik boldy. Ártisterdi kúndelikti teatrǵa alyp kelip, alyp ketý qıyndyq týdyrdy. Eger daıyndyqqa bir adam kelmeı qalsa ol turyp qalady. Sebebi spektakl qoıý komandalyq jumys. Qýanyshqa oraı qalalyq ákimdik kólik máselesin sheship berdi», - dedi teatr basshysy.
Óner janashyry elimizdiń barlyq óńirinde erekshe jandar teatrynyń ashylǵanyn armandaıdy.
«Qoıylym arnaıy tapsyryspen jazylǵan. Onyń avtory tanymal aqyn, memlekettik syılyqtyń ıegeri Gúlnár Salyqbaı. Spektakl múmkindigi shekteýli jandardyń ómirlik oqıǵalarynyń jınaǵy negizinde jazylyp shyqty. Ártisterimiz kásibı emes sondyqtan kóp ter tógýge týra kelýde. Keıbireýi mýzykany estimeıdi, keıbireýi róldi somdaýda kúlýi tıis jerde kúlmeı qoıady. Árıne men jalǵyz emespin, tıisti mamandardyń kómegimen isimiz ilgeri basyp keledi. Ártistermen qatar olardyń sahnalyq kıimi de ázirlenip jatyr. Jalpy qoıylymnyń janry lırıka, Malıka esimdi boıjetkenniń mahabbat hıkaıasy desem bolady. Spektakl lırıkalyq janrda bolǵanymen mazmuny adam taǵdyry men ómir týraly. , - dedi teatr rejısseri Nurfat Vahıtov.
Teatr rejısseri aldaǵy ýaqytta el ishinde jáne shetelge gastroldik saparǵa shyǵý josparynyń da baryn aıtyp qaldy.
«Men elordadaǵy akademııalyq fılormonııanyń solıstimin. Ol jerde 3 jyl boıy jumys istep kelemin. Teatrdyń qoıylymynda men án oryndaımyn. Naqtyraq aıtqanda, ómir, mahabbat týraly retro ánder. Meniń maqsatym án arqyly spektakldiń basty rólindegi boıjetkenniń ishki dúnıesin kórsetý. Bul teatrdyń ashylatyny týraly jyldyń basynda esttim, árıne óteq qýandym. Erekshe jandarǵa arnalǵan bólek mádenı oshaq bolsa eken dep armandaıtynmyn. Buǵan deıin teatrlarǵa kórermen retinde ǵana keletinbiz, endi ózimiz de teatrda óner kórsetý múmkindigi týyp otyr. Bolashaqta teatr qoıylymdarynan ról berilip jatsa, qýana qabyl alamyn», - dedi teatr ártisi Altynshash Muqataeva.
Aıta keteıik, elordadaǵy «Qanattylar» ınklıýzıvti teatry resmı túrde 15 qazan kúni ashylyp, kórermender nazaryna «Qanattylar» atty qoıylymdy usynady.
