Elordada aldaǵy mereke kúnderi medıtsınalyq uıymdar qalaı jumys isteıdi

ASTANA. KAZINFORM – Jańa jyl merekeleri kezeńinde turǵyndarǵa medıtsınalyq kómektiń qoljetimdiligin qamtamasyz etý maqsatynda Astana qalasynyń medıtsınalyq uıymdarynda kúsheıtilgen jumys rejımi uıymdastyryldy.

Qoǵamdyq densaýlyq saqtaý basqarmasynyń málimetinshe, Astanada alǵashqy medıtsınalyq-sanıtarlyq kómek kórsetetin 42 uıym jumys isteıdi.

Ambýlatorııalyq-emhanalyq mekemelerde jalpy praktıka dárigerleri, pedıatrlar, orta býyn medıtsına qyzmetkerleri men kezekshi ákimshilerdiń kezekshilik kesteleri bekitilgen. Demalys jáne mereke kúnderi shuǵyl jaǵdaıdaǵy naýqastardy qabyldaý, medıtsınalyq tekserý júrgizý, retsept jazý jáne ýaqytsha eńbekke jaramsyzdyǵy paraqtaryn uzartý qamtamasyz etiledi.

Emhanalardaǵy fıltr-kabınetter bekitilgen kestege sáıkes kún saıyn saǵat 08:00–den 18:00–ge deıin jumys isteıdi. Shuǵyl medıtsınalyq kómek kórsetý kabınetteriniń qyzmeti tolyq kólemde uıymdastyrylǵan.

Statsıonarlardyń qabyldaý bólimderi táýlik boıy jumys isteıdi. Beıindi mamandardyń, orta medıtsınalyq personaldyń, sondaı-aq dıagnostıkalyq qyzmetterdiń (zerthana, sáýlelik dıagnostıka) kezekshiligi qamtamasyz etilgen. Turǵyndar tarapynan kómekke júginý sany artqan jaǵdaıda jumyldyrylatyn medıtsına qyzmetkerleriniń rezervtik brıgadalary da jasaqtalǵan.

Jedel medıtsınalyq járdem men shuǵyl áreket etý qyzmetteri de qalypty, táýlik boıǵy rejımde qyzmet kórsetedi. Emhanalar, statsıonarlardyń qabyldaý bólimderi jáne jedel járdem qyzmeti arasynda ózara baılanys qamtamasyz etilgen.

Mereke kúnderi medıtsınalyq uıymdardyń jumysy táýlik boıy baqylaýda bolady.

Aıta ketelik Astanada Esil jaǵalaýyndaǵy muz aıdyny ýaqytsha jabyldy.