Elordada ákeler forýmy ótti

NUR-SULTAN. QazAqparat - Nur-Sultan qalasynda Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen «Búgingi kúnniń ákeleri» taqyrybyna V-shi respýblıkalyq ákeler forýmy offlaın jáne onlaın formatta ótti, dep habarlaıdy QazAqparat tilshisi.

28 qazanynda ótken is-sharanyń maqsaty – áke ınstıtýtyn damytý, otbasylyq qundylyqty nyǵaıtý, gender teńdigi jáne jas urpaqqa bilim berý máseleleri boıynsha múddeli taraptar úshin dıalog alańyn qurý.

Forýmdy ashqan Senat depýtaty, Qazaqstan Respýblıkasy Prezıdentiniń janyndaǵy Áıelder jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Lázzat Súleımen Prezıdent Qasym-Jomart Toqaev 2020 jylǵy 1 qyrkúıektegi Qazaqstan halqyna Joldaýynda áleýmettik qoldaý men qorǵaýyna, eldegi otbasylyq-demografııalyq jaǵdaıdy jaqsartýyna, otbasy ınstıtýtyna erekshe nazar aýdarǵanyn, bul balaǵa otbasynda durys tárbıe men laıyqty bilim berýdi, otbasynyń, qoǵamnyń jáne eldiń ıgiligi úshin adal ómir súrýge jáne jumys isteýge úıretýdi qalaı qamtamasyz etý týraly taǵy bir ret oılaýǵa negiz ekenin atap ótti.

«Bıylǵy jyldyń qıyndyǵyna qaramastan, basty maqsatymyz el ekonomıkasyn nyǵaıtý, azamattarymyzdyń ál-aýqatyn jaqsartý jáne jas urpaqty tárbıeleý bolyp qala beredi. Áıelder isteri jáne otbasylyq-demografııalyq saıasat jónindegi Ulttyq komıssııa qoǵamda jáne otbasynda ákelik ınstıtýttyń rólin arttyrý jas urpaqty tárbıeleýdegi mańyzdy mindetterdiń biri retinde qarastyrady», - dedi Lázzat Súleımen.

Forýmdy «Ákeler odaǵy» RQB tóraǵasy Maqsutbek Aıtmaǵanbet júrgizdi. Forýmda «Ákeler odaǵy» RQB jáne «Bilim-Innovatsııa» HQQ 12-16 qazan aralyǵynda «Áke joly - izgi jol» atty «Ákeler aptalyǵy» onlaın rejıminde ótti, sondaı-aq Instagram jáne ZOOM platformasy arqyly, ótkizý tájirıbesimen bólisti. Bul is-shara Qazaqstanda «Bilim-Innovatsııa» HQQ jáne «Daryn» RǴPO, Ákeler odaǵy RQB-nyń tikeleı qoldaýymen alǵash ret uıymdastyryldy.

Apta ishinde respýblıkanyń 70-ten astam mektep pen 2,5 myńnan astam belsendi áke baıqaýlar men týrnırlerge qatysty. Ákeniń bala tárbıesindegi bedelin arttyrý, otbasylyq qundylyqty damytýǵa serpin beretin taqyryptar talqylandy. Bul is-sharaǵa 600-den astam áke onlaın rejımnde qatysty.

Forýmda otbasylyq tárbıeniń ózekti máseleleri boıynsha ata-analar qaýymdastyǵy, otbasylardyń, balalardyń múddelerin qorǵaýǵa qatysatyn úkimettik emes uıymdar men memlekettik organdardyń arasynda syndarly dıalog ótti. Osy baǵyttaǵy jumysty jaqsartý boıynsha naqty usynystar talqylandy.