Elordada Ádilet úıiniń jańa ǵımaraty paıdalanýǵa berildi
Ǵımarattyń ashylý rásimine arnaıy qatysqan elorda basshysy nysandy aralap, onyń aqparattyq-kommýnıkatsııalyq jáne ınfraqurylymdyq tehnologııalarymen jete tanysty.
50 otyrys zaly men Astana qalasynyń soty, elordalyq mamandandyrylǵan aýdanaralyq ekonomıkalyq soty, Esil aýdanynyń soty jáne Esil aýdanynyń №2 soty ornalasqan ǵımaratta sot otyrystaryn jedel ótkizýge múmkindik beretin barlyq jaǵdaı jasalǵan. Ǵımaratta sot protsesterin aýdıo-beıne tirkeý qondyrǵylary men beınebaqylaý júıeleri, beıne konferentsııalar ótkizetin arnaıy apparatýra ornatylǵan. Memlekettik bajdar men ákimshilik aıyppuldar tóleý termınaldary da ornatylyp, azamattarǵa barynsha qolaıly jaǵdaı jasalǵan. Sonymen birge SMS taratý jáne elektrondy poshta arqyly sot úderisterine qatysýshylardyń barlyǵyn avtomatty túrde habardar etýdiń júıesi qarastyrylǵan. Ǵımaratta prokýrorlar, advokattar men medıatorlar kabınetteri, 8 kútý bólmesi, murajaı jumys isteıdi.
Aıta keterligi, búgin dál osy ǵımaratta QR Joǵarǵy sotynyń tóraǵasy Q.Mámı, Joǵarǵy sot Keńesiniń tóraǵasy B.Beknazarov, Memlekettik basqarý akademııasy Sot tóreligi ınstıtýtynyń dırektory M.Beıbitov, Sýdıalar odaǵynyń tóraǵasy S.Baıbatyrov, Joǵarǵy sottyń qadaǵalaýshy sot alqalarynyń tóraǵalary, Joǵarǵy sottyń sýdıalary men qyzmetkerleri, respýblıkadaǵy oblystyq jáne oǵan teńestirilgen sottardyń tóraǵalary men sýdıalary qatysýymen respýblıkamyzdaǵy sottardyń 2014 jyldyń birinshi jartyjyldyǵyndaǵy jumysynyń qorytyndysy qaralǵan bolatyn.
