Elordada Abaı dańǵylynyń bir bóligi ýaqytsha jabylady
ASTANA. KAZINFORM — Abaı dańǵylynyń Sh. Ýalıhanova kóshesinen Á. Sembınov kóshesine deıingi ýchaskede jol tóseminiń ústińgi qabatyn tóseý jumystary júrgiziledi. Bul týraly «City Transportation Systems» JShS málim etti.
Osyǵan baılanysty, aǵymdaǵy jyldyń 24-27 mamyry aralyǵynda atalǵan ýchaskede qozǵalys ishinara jabylatyn bolady.
— Júrgizýshiler men jaıaý júrginshilerden marshrýttardy aldyn ala josparlaýdy jáne qozǵalysty uıymdastyrýdaǵy yqtımal ózgeristerdi eskerýdi suraımyz. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady. Osy ózgeristerge túsinistikpen qaraýdy jáne qala boıynsha qozǵalystardy josparlaý kezinde olardy aldyn ala eskerýdi suraımyz, — delingen habarlamada.
Buǵan deıin elordada Táýelsizdik dańǵyly men Sh. Qaldaıaqov kóshesiniń qıylysy ýaqytsha jabylatynyn jazdyq.
