Elordada 9 aıda 300-den astam adam AITV ınfektsııasyn juqtyrǵan

ASTANA. KAZINFORM – Bıyl elordada toǵyz aıdyń ishinde adamnyń ımmýntapshylyq vırýsy ınfektsııasyn (AITV) juqtyrýdyń 327 faktisi tirkeldi. Bul týraly Astana qalasynyń AITV-ınfektsııasynyń aldyn alý ortalyǵynyń baspasóz qyzmeti habarlaıdy.

Ortalyqtyń aqparatynda aıtylǵandaı, AITV ınfektsııasyn juqtyrǵandardyń 75,2% - erler, 24,8% - áıelder jáne olardyń 62,4 paıyzy 20 jáne 39 jas aralyǵyndaǵy azamattar.

«Jyl saıyn astanalyqtardyń 25%-dan astamy AITV-ınfektsııasyna tekseriledi. Tegin testileýdiń qoljetimdiligi men ýaqtyly júrgizilýiniń arqasynda ınfektsııa juqtyrýdyń 80%-dan astam jaıty derttiń 1-2 satysynda anyqtalady. Aıta ketsek, ınfektsııa taralýynyń aldyn alýda ýaqtyly dıagnostıkadan ótý mańyzdy. Elimizde tegin negizde usynylatyn antıretrovırýstyq terapııa qoljetimdi», - delingen habarlamada.

Aıta ketsek, búgin Astanada dúnıejúzilik JITS-pen (juqtyrylǵan ımmýntapshylyǵynyń sındromy) kúres kúni qarsańynda AITV-ınfektsııasynyń aldyn alý aılyǵy bastaldy. Maqsat – halyqty habardar etý, saýattylyq deńgeıin arttyrý, AITV/JITS problemalaryna jurtshylyqtyń nazaryn aýdarý, profılaktıkalyq baǵdarlamalardy qoldaý, AITV-men ómir súretin adamdardy kemsitýdi azaıtý.

Bir aıdyń ishinde medıtsına qyzmetkerleriniń, azamattyq belsendilerdiń, bilim berý uıymdarynyń, vedomstvolyq organdar ókilderiniń qatysýymen adamdar kóp jınalatyn oryndarda, saýda-oıyn-saýyq ortalyqtarynda, bazarlarda, temirjol vokzaldarynda, áýejaıda, sondaı-aq basqa óńirlerden kelgen qala qonaqtary úshin AITV-ınfektsııasy máseleleri jónindegi mamanǵa testilik konsýltatsııadan keıin mindetti túrde AITV-ınfektsııasyna jedel testileý sharalary ótedi.

Odan bólek, aılyq aıasynda jastar densaýlyq ortalyqtarynyń eriktilerin tarta otyryp, stýdentterge arnalǵan forýmdar, pikirtalas, flesh-mob, dóńgelek ústel jáne vıktorınalar uıymdastyrylady.

AITV densaýlyqqa qanshalyqty qaýipti jáne onyń aldyn alý úshin ne isteý kerektigi týraly tolyǵyraq siltemege ótip tanysa alasyzdar.