Elordada 70-ten asa anaǵa «Altyn alqa» men «Kúmis alqa» tabystaldy
ASTANA. KAZINFORM — «Naýryznamanyń» onkúndigi aıasynda 17 naýryz — Shańyraq kúni retinde belgilengen. Osyǵan oraı Astanada kópbalaly analar «Altyn alqamen» jáne «Kúmis alqamen» marapattaldy, dep habarlaıdy elorda ákimdiginiń resmı saıty.
Saryarqa aýdanynda 40 ana joǵary memlekettik nagradalarmen marapattaldy. Onyń ishinde 9 ana «Altyn alqa», 31 ana «Kúmis alqa» ıegeri atandy.
— Shańyraq — qazaq úshin otbasynyń, birliktiń, urpaqtyń belgisi. Ár shańyraqtyń berik bolýy, eń aldymen, anaǵa baılanysty. Óıtkeni úıdiń jylýy da, berekesi de ananyń meıirimi men tárbıesinen bastalady. Sizderge zor densaýlyq, shańyraqtaryńyzǵa amandyq, otbastaryńyzǵa baq-bereke tileımin, — dep atap ótti Saryarqa aýdanynyń ákimi Janasyl Shaýkentaev.
Esil aýdanynda kópbalaly analardy saltanatty túrde marapattaý rásimi ótti. Іs-shara barysynda 30 anaǵa memlekettik nagradalar tabystalyp, olardyń qoǵam men otbasy aldyndaǵy eren eńbegi joǵary baǵalandy.
Atap aıtqanda, 24 ana «Kúmis alqa», al 6 ana «Altyn alqa» ıegeri atandy. Bul marapattar — analardyń urpaq tárbıesindegi ólsheýsiz eńbegine, olardyń sabyry men meıirimine berilgen laıyqty qurmet.
Saltanatty jıynda analardyń qoǵamdaǵy róli erekshe atap ótilip, otbasy qundylyqtaryn nyǵaıtý, bala tárbıesine jaǵdaı jasaý memlekettik saıasattyń basym baǵyttarynyń biri ekeni aıtyldy.
Al Saraıshyq aýdanynda 4 ana «Altyn alqa» ıegeri atansa, 19 ana «Kúmis alqa» tabystaldy. Analardy aýdan ákimi Maqsat Samatuly memlekettik nagradalarymen quttyqtap, ólsheýsiz eńbegine alǵysyn bildirdi.
Aıta keteıik, «Kúmis alqa» alqasymen alty bala dúnıege ákelip, tárbıelegen analar, al «Altyn alqa» ordenimen jeti jáne odan da kóp bala tárbıelep otyrǵan analar marapattalady.
Buǵan deıin kópbalaly otbasylar men nagradtalǵan analar 114 mlrd teńge somasyna járdemaqy alǵanyn jazdyq.