Elordada 55 júkti áıel koronavırýs ınfektsııasynan emdelip jatyr
«Elordada koronavırýsty ınfektsııany emdeý úshin 9 statsıonar jumyldyrylǵan. Onda 1 734 tósek-oryn, onyń ishinde 149 reanımatsııalyq tósek bar. Qýanyshymyzǵa oraı, qazir kovıd ınfektsııasymen syrqattaný júkti áıelder men balalar arasynda az kezdesip otyr. Búgingi tańda 55 júkti áıel KVI-ge qarsy em alýda. Onyń ishinde 23 áıel statsıonarda jatyr. Kovıdpen aýyratyn 40 bala statsıonarlyq jaǵdaıda emdelip jatyr», - dedi Tımýr Muratov elorda ákimdiginde ótken brıfıng barysynda.
Onyń aıtýynsha, kórsetkishter jaqsarǵanymen bosańsýǵa bolmaıdy. Vırýs tolyǵymen joıylmaǵanyn jáne pandemııanyń baryn este saqtaǵan jón.
«Jaǵdaıdyń birshama turaqtanýyna baılanysty biz mobıldi brıgadalardyń jumysyn qaıta qarastyrdyq. Qańtar aıynyń ortasynan bastap bul brıgadalar ambýlatorııalyq patsıentterdi táýlik boıy baqylap otyrdy. Qazir olar burynǵy jumys kestesine - tańǵy 8-den keshki 8-ge deıin qaıta kóshti. Búgin ambýlatorııalyq emdeýde 4 200-den astam adam bar. Jedel járdem stantsııasyna júkteme de azdap tómendedi. Eger qańtardyń basynda qońyraýlar sany táýligine 4 myńǵa jetse, qazir bul kórsetkish kúnine 2 000-ge deıin azaıdy. KVI máseleleri boıynsha jáne orta eseppen 80-100 adam qońyraý shalady», - dedi basqarma basshysy.
