Elordada 500-den astam orynǵa arnalǵan zamanaýı stýdenttik jataqhana salynady
ASTANA. KAZINFORM – Esil University aýmaǵynda memleket qoldaýymen MJÁ aıasynda jańa zamanaýı jataqhana salynady, dep habarlaıdy elorda ákimdiginiń resmı saıty.
Bolashaq qurylys alańynyń aýmaǵynda jańa ǵımarattyń maketi kórsetildi. Saltanatty is-sharaǵa elorda ákiminiń orynbasary Erik Meıirhanov jáne máslıhat depýtattary men qoǵam qaıratkerleri qatysty.
«Joba qalanyń Bas josparyna endi. Bári qurylysqa daıyn. Bizdiń jataqhana zamanaýı kampýs túrinde bolady. Birinshiden, bul belgili bir standarttarǵa úırengen sheteldik stýdentterdi tartýǵa múmkindik beredi. Jataqhana sheteldik jáne otandyq stýdentter úshin qoljetimdi bolady», - dedi Esil University rektory Aıapbergen Taýbaev.
Sonymen, jańa ǵımarat 507 stýdentti qabyldaı alady. Jańa jataqhananyń qurylysy 2025 jyldyń kókteminde bastalady dep kútilip otyr.
«Búgin biz jańa jataqhana jobasyn tanystyramyz. Josparǵa sáıkes, ǵımarat jalpy aýdany 6 600 sharshy metr bolatyn bes qabatty bolady. Jataqhanada barlyǵy 507 tósek-oryn qarastyrylǵan. Jertólede 210 adamǵa arnalǵan ashana bolady. Qalǵan qabattarda úsh jáne tórt bólmeli bolady. Sonymen qatar erekshe bilim berý qajettilikteri bar stýdentterge arnalǵan bir bólme qarastyrylǵan. Sondaı-aq ár qabatta kir jýatyn, útikteý bólmeleri, turmystyq as úı jáne demalys bólmesi qarastyrylǵan», - dedi ınvestor Taha Altaıly.
Aıta keteıik, bıyl Astanada MJÁ aıasynda 6 jataqhana salynyp, paıdalanýǵa beriledi. Olar 4,5 myńǵa jýyq oryn ashýǵa múmkindik beredi. Jataqhanalardyń bir bóligi qazirdiń ózinde jumys istep tur.
Sondaı-aq, 2025 jyly taǵy 2 jataqhanany paıdalanýǵa berý josparlanyp otyr.
