Elordada 480 myńnan astam adam KVI-ge qarsy tolyq vaktsınatsııadan ótti

NUR-SULTAN. QazAqparat - Koronavırýstyq ınfektsııa kórsetkishiniń tómendegenine jáne elordada karantındik sharalardyń jeńildetilgenine qaramastan indet áli de bar ári vırýs mýtatsııaǵa ushyraýy múmkin. Vaktsınatsııa COVID-19-dan qorǵanýdyń jalǵyz joly bolyp qala beredi, dep habarlaıdy qala ákimdiginiń resmı saıty.

Elordanyń bas memlekettik sanıtarlyq dárigeri Sarhat Beısenovanyń málimetinshe, qalada vaktsınanyń alǵashqy komponentin turǵyndardyń 71,6%-y, al eki komponentin 67,5%-y aldy.

Osylaısha, qazirgi ýaqytta Nur-Sultan qalasy boıynsha vaktsınanyń birinshi komponentin 509 853 azamat aldy, al ımmýndaýdyń tolyq kýrsynan 481 177 turǵyn ótti.

«Alaıda, ekpeniń ekinshi komponentin alǵan 284 814 adamnyń vaktsınatsııadan ótkenine 6 aı toldy jáne olarǵa ımmýnıtetin bekitý úshin shuǵyl túrde revaktsınatsııadan ótý qajet. Qazirgi ýaqytta turǵyndardyń 31,9%-y revaktsınatsııadan ótýi tıis.

Elordada Pfizer preparatymen vaktsınatsııalaýǵa jatatyn kontıngenttiń 16 myńǵa jýyǵy tolyqtaı ekpe aldy. Vaktsınanyń tolyq kýrsyn alǵandar arasynda birinshi orynda – 12 jastan asqan balalar men 9876 jasóspirim, odan keıin bala emizetin analar – 5673 jáne júkti áıelder – 361», – dep habarlady elordanyń sanıtarlyq dárigeri.

Sarapshylar qys aılarynda adamnyń ımmýnıteti álsireıtinin, ony nyǵaıtý úshin vıtamındeý, al koronavırýstyq ınfektsııadan qorǵaný úshin revaktsınatsııa qajet ekenin aıtady. Myna nárseni túsiný kerek: ujymdyq ımmýnıtettiń deńgeıi men uzaqtyǵy ekpe alǵan adam sanyna baılanysty bolady. Bul óz kezeginde vırýstyń odan ári aınalymy men mýtatsııasyna, sondaı-aq indettiń qaıta órshýine múmkindik bermeıdi.