Elordada 210 myńnan astam oqýshy lagerge barady

ASTANA. KAZINFORM – Elordada 210 myńnan astam oqýshy jazǵy demalys kezinde lagerine barady. Bul týraly Astana qalalyq Bilim basqarmasynyń basshysy Qasymhan Senǵazyev aıtty.

- Jazǵy demalys kezeńinde Astana qalasy boıynsha 1-10 synyp aralyǵyndaǵy 210 myńnan astam oqýshyny, onyń ishinde halyqtyń áleýmettik osal sanatyndaǵy 11 myńnan astam balany qamtý josparlanyp otyr, - dedi ol.

Onyń dereginshe, bilim berý uıymdarynyń janynan tómendegideı lagerler uıymdastyrylady:

• 92 mektep janyndaǵy lager – 55 200 oqýshy;

• 192 beıindi lager – 11 520 oqýshy;

• 10 taqyryptyq joba – 142 298 oqýshy;

• 1 qala syrtyndaǵy lager – 1 400 bala.

- Qala syrtyndaǵy saýyqtyrý lagerlerine 4 myńnan astam bala jiberiledi. Bul maqsatqa jergilikti bıýdjetten qarajat bólindi. 2025 jylǵy 1 maýsym – Balalardy qorǵaý kúnine oraı Aqmola oblysy, Aqkól aýdanynda ornalasqan «Barap» balalar sporttyq-saýyqtyrý ortalyǵynyń ashylýy josparlanǵan. Jobalyq qýattylyǵy – bir aýysymda 200 bala, jazǵy maýsymda jalpy 1 400 bala demalady dep josparlanyp otyr. Sonymen qatar elordadaǵy 13 qosymsha bilim berý uıymynyń bazasynda taqyryptyq kúndizgi lagerler men qoldanbaly óner, shet tilderi jáne júzý baǵyttary boıynsha qysqa merzimdi úıirmeler jumys isteıtin bolady, - dedi Qasymhan Senǵazyev.

Sonymen qatar ol balalardyń demalys kezeńindegi qaýipsizdigi – basty nazarda bolatynyn basa aıtty.

- Osyǵan oraı bilim berý uıymdarynyń basshylarymen birlesip, Polıtsııa, Tótenshe jaǵdaılar, Sanıtarlyq-epıdemıologııalyq qyzmet jáne qoǵamdyq densaýlyq saqtaý basqarmalary ókilderiniń qatysýymen nusqamalar, semınarlar jáne túsindirý jumystary júrgizildi. Árbir uıymǵa qaýipsizdik tehnıkasy týraly jadynamalar taratyldy, - dedi basqarma basshysy.

Buǵan deıin elimizdiń orta bilim berý júıesinde kadr tapshylyǵy tolyq joıylǵanyn jazǵan edik.