Elordada 150-den asa kásibı dezınfektor masamen kúreske kiristi

ASTANA.KAZINFORM — Astanada dezınsektsııalyq jumystyń ekinshi kezeńi bastaldy, dep habarlaıdy qala ákimdiginiń resmı saıty.

Astanada masa, shirkeı jáne basqa da jándikterdiń sanyn azaıtýǵa baǵyttalǵan tolyqqandy dezınsektsııalyq sharalar júrip jatyr. Ákimdiktiń málimetinshe, bul jumys eki aýysymda júzege asyrylyp jatyr.

Elordada 19 mamyrdan bastap óńdeý jumysynyń ekinshi kezeńi bastaldy. Bul kezeńde myna sharalar júrgiziledi:

• taıaz sý qoımalary men batpaqtanǵan ýchaskelerdi óńdeý;
• aınalma jol boıyndaǵy aýmaqtardy dezınsektsııalaý;
• jándikterdiń kóbeıý oshaqtaryn anyqtap, olardy óńdeý.

Bul jumysqa arnaıy oqytýdan jáne qaýipsizdik tehnıkasy boıynsha nusqaýlyqtan ótken 150-den astam kásibı dezınfektor jumyldyryldy.

— Qurmetti qala turǵyndary men qonaqtary, ótinemiz, júrgizilip jatqan sharalardy túsinistikpen qabyldap, óńdeý aımaqtaryna jaqyndaǵanda saqtyq sharalaryn saqtańyzdar, — delingen habarlamada.

Osyǵan deıin ǵalym Pavlodardyń keıbir aýyldarynda shybyn-shirkeıdiń ne sebepti qaptap ketkenin túsindirdi.