Elordada 15 qosymsha bilim berý nysany ashylady

ASTANA. QazAqparat – Astanada jańa oqýshylar saraıy ashyldy. Odan bólek, aldaǵy ýaqytta 15 qosymsha bilim berý nysany salynady. Bul týraly Astana qalasy bilim basqarmasynyń basshysy Qasymhan Senǵazıev málim etti, dep habarlaıdy QazAqparat tilshisi.

«Bilim berý uıymdarynyń qoljetimdiligin qamtý negizinde 5 bilim oshaǵy salyndy. Sonymen qatar, shalǵaı aýdandarda olardyń fılıaly ashyldy. Odan bólek, bıyl bir aýysymda 700 balany qabyldaıtyn oqýshylar saraıy ashyldy. Aldaǵy ýaqytta Prezıdenttiń tapsyrmasy boıynsha 15 qosymsha bilim berý nysanyn salý josparlanyp otyr. Osy oraıda, máslıhat depýtattaryna qaı jerde, qandaı bilim berý mekemesi salynatynyn kórsetkimiz keledi», - dedi Qasymhan Senǵazıev qalalyq máslıhattyń otyrysynda.

Onyń aıtýynsha, búginde 5 qosymsha bilim berý nysany salynatyn jer anyqtaldy.

«2024 jyly atalǵan 5 qosymsha bilim berý mekemesiniń qurylysyn bastap, jyl sońyna deıin aıaqtaý josparda bar», - deıdi ol.