Elordada 14 myń adam apatty úıde turyp jatyr – Astana ákimi

ASTANA. KAZINFORM – Astanada apatty turǵyn úılerdi buzý jumystary 2028 jylǵa deıin aıaqtalýy tıis. Bul týraly elorda ákimi Jeńis Qasymbek málim etti.

«Renovatsııa boıynsha úlken jospar bar. Qalada kóptegen eski jáne apattyq jaǵdaıdaǵy turǵyn úıler bar. Qazir apatty turǵyn úıde turatyn 14 myńǵa jýyq páter ıeleri bar. Apatty turǵyn úılerdi buzý jáne jańa baspana berý máselesin 2028-2029 jylǵa deıin tolyǵymen sheshýimiz kerek. Eger buryn 250-ge jýyq turǵyn úıdi súrip, jańa páterler bersek, bıyl apatty jaǵdaıdaǵy turǵyn úılerdiń ornyna 700 páter beremiz. Kelesi jyly bul kórsetkishti 1000 páterge deıin kóterýdi josparlap otyrmyz», - dedi Jeńis Qasymbek qalanyń bıznes qaýymdastyǵy ókilderimen kezdesýi barysynda.

Ákimniń sózinshe, apatty turǵyn úılerdiń sany resmı derekten áldeqaıda kóp jáne olardy buzý jumystary 2028 jylǵa deıin aıaqtalýy tıis.

«Odan bólek, eski turǵyn úıler de jetkilikti. Sonymen qatar, turǵyn úı emes, garajdar, saıajaılar sııaqty úı-jaılar bar. Tipti qala ortalyǵynda B. Momyshulynyń boıynda Myńjyldyq alleıasyna qaraı, Han Shatyrdyń artynda buzýǵa jatatyn taǵy birneshe úı bar», - dep tolyqtyrdy Astana ákimi.

Buǵan deıin Jeńis Qasymbek elordada turǵyn úı salýdy ýaqytsha shekteýge qatysty túsinik bergen edi.