Elordada 100-ge jýyq adam masaǵa qarsy ýlaý jumystaryn júrgizip jatyr
ASTANA. KAZINFORM — Qazir Astanada 476 ga aýmaq masaǵa, shybyn-shirkeıge jáne kemirgishterge qarsy óńdeldi, dep habarlaıdy qala ákimdiginiń baspasóz qyzmeti.
Elordada aýa raıy jylynǵan kúnnen bastap qan soratyn jándikterge qarsy kúres kúsheıdi. Sol sebepti sáýir-qazan aılary aralyǵynda Astana qalasynda jáne onyń mańynda aýa raıyn eskere otyryp, tıisti is-sharalar júrip jatyr.
Dezınsektsııalyq jumystar aı saıyn (sáýir-qazan) 15 kún ishinde 6 týr boıynsha júrgiziledi, bul jumysqa 100-ge jýyq adam, arnaıy kólik, termogeneratorlar jumyldyrylady.
Aı saıyn ashyq statsııalar (saıabaqtar, gúlzarlar, kósheler, turǵyn alaptar, ózender men kanaldardyń jaǵalaýy), sondaı-aq 120-dan astam turaqty jáne 100-den astam ýaqytsha sý aıdyndary óńdeledi.
23 sáýirden bastap birinshi týr boıynsha óńdeý bastaldy. Bul jumys barysynda kishi Taldykól, taıaz sý aıdyndary men batpaqty ýchaskeler, sondaı-aq aınalma jol boıyndaǵy jáne t. b. oryndar óńdeldi. Barlyǵy 500 gektar aýmaq óńdeldi.
28 sáýirde Turan-Syǵanaq-Túrkistan-Dostyq-Turan aýmaǵyn, Táshenov kóshesi boıymen Aqbulaqqa qaraı Amman kóshesine deıingi baǵytty esepke alǵanda, saıabaqtar, qala ortalyǵynyń ashyq stantsııalaryn óńdeý bastaldy.
— Aıta ketý kerek, dernásil satysynda sý qoımalaryndaǵy faýna men floraǵa zııan keltirmeıtin bıologııalyq preparattar qoldanylady. Jeke sektor (turǵyn alaptar) jáne ashyq aýmaqtar (saıabaq, ózender, sý aıdyndary, kanaldar, zırattar) óńdeýge jatady. Jeke sektor turǵyndaryna arnaıy ýlandyrý dárileri tegin taratylady, sondaı-aq qaýipsizdik nusqamasy beriledi. Mamandar 14-30 sáýir aralyǵynda 30 myńǵa jýyq úıdi aralap shyqty. 1 mamyrdan 1 maýsymǵa deıin 3 264 gektar aýmaqtaǵy saıabaqtardy, ózen mańyn, sý aıdyndaryn, kanaldar men zırattardy qosa alǵanda, ashyq statsııalar óńdeledi. Búgingi tańda 476 ga óńdeldi, — delingen ákimdik taratqan aqparatta.
Mundaı sharalar kemirgishter sanyn azaıtý jáne asa qaýipti juqpaly aýrýlardyń taralýyn boldyrmaý úshin qajet.