Elorda mańyndaǵy Patsha qorǵanynan áıelderdiń áshekeıleri tabyldy
Instıtýt arheologtarynyń zertteý jumystary barysynda qorǵannyń joǵary qabatyndaǵy bastapqy jeti qabir ashylyp, zerttelgen. Arheologtar tobynyń jetekshisi, tarıh ǵylymdarynyń kandıtaty, K. Aqyshev atyndaǵy arheologııa ǵylymı-zertteý ınstıtýtynyń dırektory Maral Habdýlınanyń aıtýynsha, jerleý rásimi boıynsha zırattar 15-16 ǵasyrlarǵa jatqyzylǵan.
«Aıta keteıik, olar musylman dástúrimen jerlengen. Jalpy qorymnan ázirge jeti qabir qazyldy. Osy jeteýdiń ishindegi eki moladan áshekeıler tabylyp otyr, bireýin biz áıel adamnyń qabiri dep otyrmyz. Onyń ishinde qola syrǵa men kúmis jip boldy. Al ekinshisin boıjetken qyz balanyń qabiri dep topshyladyq, sebebi tabylǵan neke júzigi jerlengen máıittiń oń saýsaǵynda boldy», - dedi arheologııalyq toptyń jetekshisi Maral Habdýlına.
Qorǵan Qaraǵandyǵa baratyn jolda Kúıgenjar shatqalynda ornalasqan. Qazirgi kezde saqtar qorǵanynyń shetinde qazaq zıraty bar. Taspen jabylǵan qorǵannyń bıiktigi 4 m, dıametri - 60 m. Onyń granıt tastary Nura ózeniniń jaǵasynan alynǵany belgili.
«Qazir Astana qalasy aýmaǵynda jergilikti mańyzǵa ıe 46 tarıhı-mádenı eskertkish bar. Osy 46 eskertkishtiń 12-si arheologııalyq eskertkish. «Rýhanı jańǵyrý» baǵdarlamasynyń «Kıeli Qazaqstan» arnaıy jobasynyń aıasynda osy jyly 4 arheologııalyq eskertkishke ǵylymı-zertteý jumystaryn júrgizý josparlanǵan, al osy qorǵandaǵy jumystar sonyń basy», - dedi Mádenıet jáne sport basqarmasynyń bólim basshysy Asqar Qalybaev.
Onyń aıtýynsha, osy qorǵannyń tańdalǵan sebebi bul jerdegi aýyl zıraty qorǵanǵa taqap qalǵan. Bir-eki qabir týra irgeles qazylǵan.
«Qorymǵa qarap otyrsańyzdar jer qatparynan da baıqalady. Topyraq qabaty sary, qońyr tústi. Biz osy qorymnyń naqty qaı ǵasyrǵa jatatynyń anyqtaý úshin tórt bas súıektiń azý tisi men aldyńǵy tisterin alyp Italııaǵa, al antropologııalyq synama júrgizý úshin súıekterdi Almatyǵa jiberemiz. Onda adamnyń shyǵý tegin, damýyn, dene qurylysyn, násildik erekshelikterin anyqtaıdy», - deıdi Maral Habdýlına.
