Elorda mańyndaǵy «qupııa» velosıpedshiler joly

NUR-SULTAN. QazAqparat – Elorda aýmaǵyndaǵy «jasyl beldeýdegi» 23 shaqyrymdyq velosıpedshilerge arnalǵan jol – qala turǵyndar úshin tabıǵat aıasynda demalatyn oryndardyń biri.

Velotrassa Qorǵaljyn tasjoly men Qaraótkel, ıaǵnı Qosshy kentine qaraı ótetin joldy jalǵaıdy.

Bul jerdi karantın kezinde elordalyqtar úshin demalýǵa taptyrmas oryndardyń biri dep túıdik. Munda tapyrlap júrgen adamdardyń qarasy kórinbeıdi. Demalys kúni ekenin eskerip qaraǵannyń ózinde de, tek anda-sanda kózge saǵymdaı kórinetin velesıpedshiler men balalaryn jetektegen birli-jarymdy adamdardy ǵana kezdestiresiz.

«Jasyl beldeýdegi» eni 2 metrlik velotrassa 2016 jyly paıdalanýǵa berilse de qalalyqtar úshin asa tanymal emes ekenin kórýge bolady... «Men osy qalada 10 jyldan astam turamyn. Biraq osyndaı keremet demalýǵa múmkindik beretin orynnyń baryn birinshi ret óz kózimmen kórip otyrmyn. On jyl qalada turyp osyndaı jerdiń baryn bilmeý uıattaý sııaqty (kúldi). Ózińiz bilesiz, jaı kúnderi elordada kóp adamnyń anda-mynda barýǵa, demalýǵa ýaqyttary bolmaı jatady. Ýaqyt shyqsa, tabıǵat dep balalarymdy alyp Býrabaıǵa ketip qalamyz, sol jaqtan talaı velosıped jalǵa alyp tepken edim. Endi myna jer keremet eken, karantın jaqsy boldy (kúldi)», - deıdi elordalyq Aıdyn.

Alaıda, biz mundaǵy adamdardyń óte az bolý jaǵdaıynyń bir sebebin velosıpedti jalǵa berý qyzmetiniń áli qosylmaǵanynan dep túsindik. Onyń ústine Qorǵaljyn tasjoly jaǵy men onyń ekinshi shetinde de úlken qurylystar salynyp jatyr.

«Velosıpedterdi jalǵa berý qyzmetine áli ruqsat berilgen joq sondyqtan bizdiń jumysymyz toqtap tur. Biraq ózińiz kórip tursyz myna jerde qurylys qarqyndy júrip jatyr, bolashaqta keremet demalys oryndarynyń birine aınalady», - deıdi velosıpedti jalǵa berýshi Erbol.

2 metrlik velotrassanyń eki jaǵy samsap ósken qaıyń, úıeńki taǵy da basqa túrli aǵashtar búkil joldy qamtıdy. Jol boıynda demalatyn oryndar men qoqys tastaıtyn jáshikter ortatylǵan.