Elorda kúni: Eki oblystyń jármeńkesi ótip jatyr
«Aqmola oblysy elorda kúnine oraı úlken aýylsharýashylyǵy jármeńkesi uıymdastyrylýda. Búgin 10 aýdan óz ónimderin elordalyqtar satyp alýy úshin usynsa, erteń 9 aýdan men Kókshetaý qalasynyń aýyl sharýashylyǵy taýarlaryn óndirýshileri keledi. Jalpy 100 tonna jylqy, sıyr, qoı, qus etin ákeldik. Tańerteńgi 8-den astam jármeńkeni bastadyq, halyq kelip qalaǵan ónimderin satyp alyp jatyr», - dedi QazAqparat tilshisine suhbat bergen Aqmola oblysy ákiminiń orynbasary Marat Iǵalı.
Onyń atap ótýinshe, Aqmola oblysy men Nur-Sultan qalasynyń ákimdikteri arasynda arnaıy kelisim bar. Sol kelisimge sáıkes Aqmola oblysy kúzde de elordada aýyl sharýashylyǵy taýarlarynyń jármeńkesin ótkizýdi josparlap otyr.
«Jalpy jármeńkege ákelgen ónimderimizdiń jalpy salmaǵy 500 tonnaǵa jýyqtaıdy. Onyń ishinde sút, makoron, kondıterlik ónimder, sary maı, ósimdik maıy, un men un ónimderi bar. Elorda turǵyndaryn osy jármeńkege kelip, aran baǵaǵa aýyl sharýashylyǵy ónimderin satyp alýǵa shaqyramyz», - dedi Marat Iǵalı.
Shynymen de jármeńkede satyp jatqan ónimder elorda bazarlaryndaǵy baǵadan álde qaıda arzan. Máselen, jylqy etin 1 700, sıyr etin 1 500, qoı etin 1 400, qus etin 850 teńgege satyp alýǵa bolady. Jumyrtqanyń 10 danasy 160 teńge bolsa, súttiń lıtri 205 teńge. Al qaımaqtyń kelisin 950, sary maıdy 2 200 teńgeden satyp alýǵa múmkindik bar.
Pavlodar oblysynyń da aýyl sharýashylyǵy taýarlaryn óndirýshileri ákelgen ónimder de arzan. Eki oblystyń da satyp jatqan ettiń baǵasy birdeı. Qymyzdyń lıtri 600 teńge, baldyń kelisi 1 500 teńgeden satylýda.
