Elorda bazarlarynda sannorma boıynsha kóptegen quqyqbuzýshylyq anyqtaldy
Tekserý jumystary quqyq qorǵaý organdarynyń, taýarlar men qyzmetterdiń sapasyn jáne qaýipsizdikti qadaǵalaý basqarmasy ókilderiniń jáne basqa da múddeli memlekettik qyzmetkerler men buqaralyq aqparat quraldarynyń qatysýymen ótti. Sanıtarlyq normalardyń saqtalmaýyna baılanysty birneshe ákimshilik hattama toltyryldy.
Bas sanıtarlyq dárigerdiń qaýlysymen demalys kúnderi jabyq bazarlardyń qyzmetine tyıym salynǵanyna qaramastan, olardyń kópshiligi jumys isteıtin bolyp shyqty. Ol jaqtarda adam kóp jınalǵan.
Máselen qaladan shyǵa beristegi Shanhaı bazaryna qarama-qarsy Sharyn bazarynyń jumys istep turǵany belgili boldy. Reıdke qatysýshylar kókónister men jemisterdiń, sondaı-aq basqa da azyq-túlik ónimderiniń saýdasy erkin satylatyn jabyq jumys isteıtin pavılondy anyqtady. Tekserýler barysynda sanıtarlyq normalardy barlyǵy saqtamaıtyndyǵy, keıbir satýshylar maskany qate kıetini, eshqandaı maskalardyń turmaǵany belgili boldy. Sondaı-aq sanıtaızerler de bolmaǵan.
«Munda 300-ge jýyq kásipker jumys isteıdi. Biz sanıtarlyq normalardyń saqtalýyn baqylaýǵa tyrysamyz. Bizge demalys kúnderi jumys isteýge bolmaıtynyn bilmedik. Árıne, mundaı reıdterdiń ótkizilip turǵany durys. B0iz barlyq eskertý boıynsha kemshilikterdi túzetýge tyrysamyz. Buryn saýda tek kóshede júrgiziletin, biraq kúnniń kúrt sýytýyna baılanysty barlyǵy osy jabyq pavılonǵa keldi», - deıdi bazar baqylaýshysy Aıylhan Qalmyrzaev.
Sharynnyń janynda taǵy bir jabyq bazar bar. Biraq munda tek birneshe pavılon jumys istep tur eken. Alaıda ol jerlerde de sanıtaızerler men maskalar bolmaı shyqty.
Ortalyq bazarda mundaı zańbuzýshylyqtar anyqtalmady. Jabyq pavılondardyń barlyǵy ashylmaǵan. Ashyq jerlerde saýda bar. Áıtse de olardyń bári birdeı maska taǵyp júrgen joq. Jaqyn mańdaǵy «Samǵaý» jabyq bazary da demalys kúnderi jumysyn toqtatpaǵan.
Anyqtalǵan barlyq zańbuzýshylyq boıynsha ákimshilik hattama toltyrylyp, olardyń ıelerine qazir iri kólemde aıyppul salyndy.
«Negizinen biz karantın sharalarynyń saqtalýyn sanıtarlyq dárigerdiń buıryǵyna sáıkes júrgizemiz. Kóbinese jumys ýaqytyn saqtamaý, maska taqpaý, sanıtaızerlerdiń bolmaýy, áleýmettik araqashyqtyqty saqtamaý sekildi jaǵdaılar jıi kezdesedi. Saýda úılerinde kassalardyń janynda adamdar jıi jınalyp qalady. Barlyǵy termometrııadan óte bermeıdi», - deıdi Baıqońyr aýdanynyń taýarlar men qyzmetterdiń sapasyn jáne qaýipsizdikti qadaǵalaý basqarmasynyń basshysy Saltanat Yqylasova.
Onyń aıtýynsha, shildeden bastap búgingi kúnge deıin elordada kásipkerlik sýbektilerine jalpy somasy 133 766 808 teńgeni quraǵan 627 ákimshilik hattama toltyrylǵan. Búgingi kúni olardyń 509-y 110 196 325 teńge kóleminde aıyppuldardy ótep, tórt materıal sotqa joldanǵan.
Sanıtarııalyq normalardy buzǵany úshin shaǵyn bızneske 230 AEK, ortasha bızneske 430 AEK, iri kásipkerliktiń ókilderine 1600 AEK aıyppul salynady.
Aıta ketsek, jalpy quzyrly organdarynyń reıdterimen qatar Aqparat jáne qoǵamdyq damý mınıstrliginiń bastamasymen jalpy qoǵamdyq baqylaý jumysy búkil respýblıka aýmaǵynda júrgizilip jatyr. Sanıtarlyq-epıdemıologııalyq talaptardy buzǵany úshin 5 shildeden beri búkil elde kásipkerlik sýbektileri men jeke tulǵalarǵa qatysty 15817 ákimshilik hattama (QR ÁQBK 425-baby 1-bóligi) toltyrylyp, olarǵa jalpy somasy 894,8 mln teńgeniń aıyppuly salynǵan. Onyń ishinde jeke tulǵalar 307,4 mln teńge kóleminde jaýapkershilikke tartylǵan.
Buzýshylyqtar sany boıynsha TOP-3 aımaqtar: Almaty qalasy (3837 hattama), Túrkistan oblysy (2974 hattama) men Qostanaı oblysy (1323 hattama) bolyp otyr.
