Elorda áýejaıynda ushaqqa mingeli turǵan jolaýshynyń sómkesinen kirpish shyqty
Elorda áýejaıynyń avıatsııalyq qaýipsizdik qyzmetiniń ınspektorlary jyldyń basynan bastap jolaýshylardy tekserý pýnkterinde 6 myńǵa jýyq tyıym salynǵan zat tapqan.
Tekserý barysynda kózge erekshe túsken zattardyń qatarynda chemodandardyń tutqalary men beldikter, sonymen birge aıaq kıimderde jasyrylǵan kastetter men pyshaqtar boldy.
Al, jolaýshylardyń biriniń qol júginen, tipti, qurylysqa arnalǵan kirpishter tabylǵan.
«Nursultan Nazarbaev halyqaralyq áýejaıy» AQ baspasóz qyzmeti qazaqstandyqtarǵa qol júginde qandaı zattardy alyp júrýge bolmaıtyny týraly jáne ushaqtyń bortyna nege shashqa arnalǵan lak, gel jáne qyrynýǵa arnalǵan kóbik syndy qaýipti emes zattardy alyp kirýge jol berilmeıtinin aıtyp berdi.
Jolaýshylardyń qaýipsizdigin qamtamasyz etý maqsatynda syıymdylyǵy 100 ml-den asatyn konteınerlerdegi kez kelgen suıyqtyqty (sý, sýsyndar, qyrynýǵa arnalǵan kóbik jáne t.b.), ásirese belgisiz quramdaǵy zattar men suıyqtyqtardy (zaýyttyq qaptamasyz, tehnıkalyq pasportsyz jáne sertıfıkatsyz) qol júgimen tasymaldaýǵa tyıym salynady.
Aıta ketken jón, bul - astanalyq áýejaıdyń oılap tapqan erejesi emes, álemdik avıatsııalyq tájirıbeden alynǵan jaǵdaılarǵa negizdelgen qaýipsizdik standarty.
«Avıatsııa tarıhynda lańkesterdiń qarapaıym pyshaq nemese ustaranyń kómegimen áýe kemelerin kepilge alý, urlaý nemese joıý jaǵdaılary oryn alǵan. Keıbir shabýyldar, tipti, suıyq jarylǵysh zattardyń kómegimen de júzege asyrylǵan. Sondyqtan jolaýshylar atalǵan erejelerge túsinistik tanytady degen senimdemiz», - dep atap ótti áýe aılaǵyn tekserý qyzmetiniń basshysy Ǵabıt Súleev.
Aıta keterligi, belgili bir zattar adamnyń kinásinen emes, materıaldardyń fızıka-hımııalyq qasıetterine baılanysty qaýip tóndirýi múmkin.
Máselen, joǵary bıiktikte qysymnyń tómendeýine baılanysty gazy bar suıyqtyqtarmen toltyrylǵan konteınerler jarylýy múmkin.
Eger dárigerdiń nusqaýlyǵy bolsa, dári-dármekti, balalar taǵamyn jáne arnaıy dıetalyq qajettilikterdi qol júginde tasymaldaýǵa bolady.
Alaıda, ushý kezinde qajet mólsherde ǵana alý kerek.
Qol júgimen tasymaldaýǵa ruqsat etilmegen keıbir zattardy tirkeýden ótken bagajda alyp júrýge bolady.
Atap aıtqanda, 100 ml-den astam suıyqtyqtar, aerozolder jáne gelder (sý, sýsyndar, sýsabyndar, qyryný kóbikteri jáne basqa), sondaı-aq jumys quraldary.
Eger oryn aldyn ala brondalmasa nemese avıakompanııadan ushýǵa qatysty rastaý alynbasa, jolaýshylarǵa úı janýarlaryn tasymaldaýǵa tyıym salynýy múmkin.
Sonymen qatar janýarlardy tasymaldaıtyn jolaýshylardyń qolynda veterınarlyq sertıfıkat jáne halyqaralyq veterınarlyq pasport bolýy shart.
Áýejaı ókilderi sonymen qatar «Jolaýshylardan tárkilengen zattar qaıda ketedi jáne olardy qaıtaryp alýǵa bola ma?» degen kópshilikti tolǵandyratyn suraqtarǵa jaýap beredi.
Atalǵan jaǵdaı oryn alsa, jolaýshylardyń nazaryna birneshe nusqa usynylady: zattardy shyǵaryp salýshy adamǵa berý; eger ruqsat etilse, zattardy bagajǵa tapsyrý; 30 táýlik merzimge saqtaýǵa berý hattamasyn toltyrý.
Eger bir de bir nusqa jolaýshynyń talabyna sáıkes kelmese, jolaýshylarǵa arnaıy qyzmet kórsetetin kompanııa zatty kádege jaratý týraly shart jasasýdy usynady.
Osy oraıda elordalyq áýejaıdyń áýe qaýipsizdigi qyzmeti bagajdy jınaý barysynda jolaýshylarǵa barynsha jaýapkershilik tanytyp, qol júgi men bagaj tasymaldaýda tyıym salynǵan zattardyń tizimimen aldyn ala tanysýǵa keńes beredi.
Atap aıtqanda:
- jarylǵysh qurylǵylar men zattar;
- tez tutanatyn suıyqtyqtar men zattar, onyń ishinde atseton, quramynda 70%-ten astam alkogoli bar sýsyndar;
- tutanǵysh qatty zattar;
– atys qarýynyń barlyq túri, sıgnaldyq zymyran tasyǵyshtar, tapanshalar, shok jáne elektrmen zaqymdaý qurylǵylary, rogatkalar, sondaı-aq olarǵa uqsas barlyq kóshirme men zattar, onyń ishinde oıynshyqtar túrindegi;
– atys jáne gaz qarýyna arnalǵan oq-dáriler, onyń ishinde jaýyngerlik, jaryq-dybystyq, travmatıkalyq áreketti patrondar;
- pyshaq, úshkir zattar, sondaı-aq olarǵa uqsas zattar;
- suıytylǵan gazdar, onyń ishinde turmystyq paıdalanýǵa arnalǵan gazdar, aerozolderdiń barlyq túri;
- radıoaktıvti jáne esirtki zattary;
- ýly zattar, juqpaly nemese bıologııalyq qaýipti materıaldar.
Foto: Nursultan Nazarbaev halyqaralyq áýejaıynyń baspasóz qyzmeti
