Elorda ataýynyń ózgerýin onomastıka komıssııasy qoldady

NUR-SULTAN. QazAqparat – Nur-Sultan qalasynyń onomastıka komıssııasy elorda ataýyn ózgertýge qatysty usynysty qoldady, dep habarlaıdy QazAqparat.

Qala ákimdiginiń resmı saıtynda málim etilgendeı, onomastıka komıssııasynyń kezekti otyrysy ótti.

«Kún tártibine sáıkes Nur-Sultan qalasynyń ataýyn Astana dep qaıta ataý týraly másele talqylandy. Osyǵan deıin Nur-Sultan qalasynyń turǵyndarynan birneshe ret, sondaı-aq QR Parlamenti Májilisindegi «Jańa Qazaqstan» depýtattyq toby elordany Astana qalasy dep qaıta ataý týraly másele kótergen bolatyn.

Onomastıka komıssııasynyń otyrysynda QR Ǵylym jáne joǵary bilim mınıstrliginiń «Memleket tarıhy ınstıtýty» RMM dırektorynyń orynbasary, tarıh ǵylymdarynyń doktory, professor Búrkitbaı Aıaǵan, tarıh ǵylymdarynyń doktory, professor Marat Ábsemetov, pedagogıka ǵylymdarynyń doktory, qoǵam qaıratkeri Tileýǵalı Qyshqashbaev, Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy» kommertsııalyq emes aktsıonerlik qoǵamynyń bas dırektory Erbol Tileshov, Qazaqstan jazýshylar odaǵy Nur-Sultan qalalyq fılıalynyń tóraǵasy Dáýletkereı Kápuly sóz alyp, atalǵan usynys jaıly oń kózqarastaryn bildirdi.

Onomastıka komıssııasynyń músheleri elordanyń ataýyn ózgertý týraly usynysty qoldady», - delingen málimette.

Aıta keteıik, erteń Nur-Sultan qalasynyń ataýyn ózgertý máselesi elorda máslıhatynda qaralady.

Májilis depýtattarynyń Nur-Sultan qalasyna Astana ataýyn qaıtarý usynysy Memleket basshysynyń kelisimimen Konstıtýtsııalyq zań jobasyna engizilgen bolatyn.

Qarjy mınıstrligi elorda ataýyn qaıtarý úshin qosymsha qarajat qajet etilmeıtinin málim etti.

Foto: gov.kz