Elnur Beısenbaev AES salý týraly: ǵylymı turǵydan qaraý kerek

ASTANA. KAZINFORM – Májilis depýtaty Elnur Beısenbaev elimizde atom elektr stantsııasyn salýǵa qatysty pikir bildirdi.

«Aıtalyq, zaýytty kóp mólsherde elektr energııasymen qamtamasyz etý kerek. Ol úshin energııany jel, kún elektr stantsııalary arqyly alýǵa bolady. Keıbir adamdar Fýkýsıma men Chernobyldegi jaǵdaıdy mysalǵa keltirip jatyr. Biraq, Reseı men Japonııa atom elektr stantsııasynan bas tartqan joq. Búginde atalǵan eki el elektr energııasy turaqtylyǵynyń 30%-yn osy AES arqyly ustap otyr. Odan bólek, AES-ti Semeı polıgonymen salystyryp jatyr, ol jerde elektr qýatyn óndirý emes, qarý-jaraq retinde qarastyryldy. Bul salystyrýǵa kelmeıdi», - dedi Elnur Beısenbaev elimizde atom elektr stantsııasyn salý máselesi boıynsha elordada ótken qoǵamdyq tyńdaýda.

Sondaı-aq, halyq qalaýlysy AES tájirıbesi boıynsha Qytaıdy mysalǵa aldy.

«Búgin kóterilip otyrǵan máselelerdi ǵylymı turǵydan qaraý kerek. Máselen, osydan 12 jyl buryn Beıjińde demalatyn aýa bolmaıtyn. Óıtkeni ónerkásiptiń bári kómir jaǵatyn. Qytaı aldaǵy ýaqytta taǵy 150 reaktor salýdy josparlap otyr. Qazir Beıjiń eń taza qalalardyń biri», - deıdi ol.