Elimizge tikeleı sheteldik ınvestıtsııalar tartý tómendedi me

ASTANA. KAZINFORM – QR Ulttyq ekonomıka mınıstrligi elimizge tikeleı sheteldik ınvestıtsııalar tartý máselesi boıynsha Kazinform agenttiginiń resmı suraýyna jaýap berdi.

– Jahandyq naryqtaǵy belgisizdik pen jetekshi ekonomıkadaǵy óndiristik jáne ınvestıtsııalyq belsendiliktiń tómendeýi aıasynda Úkimet ınvestıtsııalyq ahýaldy jaqsartý baǵytynda naqty sharalar qabyldap jatyr. Sonymen qatar retteýshi saıasatty jetildirý, ákimshilik kedergilerdi joıý jáne ekonomıkanyń negizgi salalarynda kapıtal tartý úshin qolaıly jaǵdaı jasaý boıynsha júıeli jumys júrgizilip jatyr, - dep málimdedi mınıstrlik.

Vedomstvanyń aqparatyna sáıkes, qazirgi tańda Investıtsıalyq shtab sheńberinde eldiń ınvestıtsııalyq áleýetin arttyrýǵa kedergi keltirip otyrǵan tosqaýyldardy joıý jáne jańa múmkindikter ashý baǵytynda belsendi jumys atqarylyp jatyr. 

– Transqazaqstandyq temirjol dálizin jańǵyrtý, magıstraldyq jelilerdiń ótkizý qabiletin arttyrý boıynsha naqty usynystar qarastyrylýda. Bul bastamalar elimizdiń kólik-logıstıkalyq áleýetin arttyryp, ınvestıtsııa tartý máselesine serpin beredi, - delingen jaýapta. 

Resmı málimet boıynsha, 2024 jyly Qazaqstanǵa tartylǵan tikeleı sheteldik ınvestıtsııalar kólemi 17,2 mlrd AQSh dollaryn qurady, onyń ishinde 10,7 mlrd dollary óńdeýshi emes sektorǵa baǵyttalǵan.

– Bıyl qańtar-mamyr aılarynda negizgi kapıtalǵa salynǵan ınvestıtsııalar kólemi 5 952,4 mlrd teńgege jetip, ótken jyldyń sáıkes kezeńimen salystyrǵanda 18,2 paıyzǵa artty. Al tikeleı ınvestıtsııalar boıynsha 2025 jyldyń birinshi toqsany boıynsha derekter 30 maýsymda Ulttyq Banktiń saıtynda jarııalanady, - dep naqtylady mınıstirlik. 

Osy máselege qatysty KAZINFORM tilshisi sarapshy Rasýl Rysmambetovten suhbat alyp, jaǵdaıdyń mán-jaıyn naqtylaýǵa tyrysty. 

– Qazaqstan teńizge shyǵa almaıtyn elder qatarynda. Sondyqtan logıstıka men tranzıt bizge aýadaı qajet. Osy baǵytty memleket ózi damytýy kerek, - deıdi ol.

Sarapshynyń aıtýynsha, qazirgi kezeńde eń basty basymdyq – eksporttyq baǵyttardy kúsheıtý. 

– Prezıdent te aıtty ǵoı jaqynda – temirjoldardyń myńdaǵan shaqyrymy jańadan salynady. Bul – bizdiń taýardy syrtqa shyǵarýdyń joly. Bizge qazir jumys isteıtin logıstıkalyq marshrýttar qajet, - dedi Rysmambetov.

Sonymen qatar salyqtyq jáne retteýshi yntalandyrýlarǵa qatysty sarapshy bylaı dep pikir bildirdi.

– Qaı salaǵa ınvestıtsııa tartqymyz keledi – sony naqtylap alýymyz kerek. Mysaly, aýyl sharýashylyǵy mańyzdy sala, biraq sheteldikterge jer satýǵa tyıym bar. Bul – oryndy shekteý. Degenmen, eger syrttan tehnologııa keletin bolsa, belgili bir mehanızmder qajet. Al oǵan deıin ınfraqurylym men logıstıkany túzep alý kerek, - dedi ol.

Sondaı-aq taý-ken metallýrgııa kesheni týraly da óz oıyn aıtty.

– Biz shıkizatty eksporttaýda tájirıbelimiz. Biraq endi eń bastysy – daıyn ónim óndirý. Qazir sheteldik ınvestorlar qaıta óńdeýge asyqpaı otyr. Sondyqtan memleket birinshi ózi bastamashy bolýy tıis. Sonda ǵana senimdi seriktestik ornaıdy, – dep túıindedi Rasýl Rysmambetov.

Eske sala keteıik, premer-mınıstr Oljas Bektenov Sheteldik ınvestorlar keńesi qatysýshylarymen kezdesý barysynda Prezıdent belgilegen ınvestıtsııalyq yntymaqtastyqtyń keleshegi zor baǵyttaryn talqylaǵan bolatyn.