Elimizdiń kolledjderiniń úzdik stýdentteri anyqtaldy
ASTANA. KAZINFORM – Jumysshy mamandyqtarynyń jyly aıasynda Oqý-aǵartý mınıstrliginiń uıymdastyrýymen búgin «Qazaqstan Respýblıkasynyń kolledjderiniń úzdik 100 stýdenti» respýblıkalyq baıqaýynyń jeńimpazdaryn marapattaý rásimi ótti. Bul týraly Oqý-aǵartý mınıstrliginiń baspasóz qyzmeti habarlady.
Bul baıqaý respýblıkanyń túpkir-túpkirinen kolledjderdiń eń úzdik, eń talantty, eń daryndy stýdentterdiń basyn qosty. Saltanatty sharaǵa Oqý-aǵartý mınıstri, Parlament Senatynyń depýtattary, bıznes qaýymdastyqtardyń ókilderi, tehnıkalyq jáne kásiptik bilim berý uıymdarynyń stýdentteri, pedagogter men ardagerler qatysty. Búginde tehnıkalyq jáne kásiptik bilim berý salasy elimizdiń bilim berý ekojúıesinde strategııalyq mańyzǵa ıe. Bul jóninde saltanatty rásimde sóz sóılegen Ǵanı Beısembaev atap ótti. Mınıstr úzdik 100 stýdentti bolashaqtyń qurylysshylary retinde elge tanystyrý, olardyń esimderin keńinen dáripteý, jastarǵa úlgi etý qajettigin aıtyp, bul baǵytta jaýapty qurylymdyq bólimshelerge naqty tapsyrmalar júktedi.
— Elimizdiń bolashaǵy — ıntellektýaldy, bilimdi, zamanaýı jastardyń qolynda. Sizderdiń sapaly bilim alyp, halyqaralyq deńgeıde básekege qabiletti maman retinde qalyptasýlaryńyz — memleket nazaryndaǵy basty másele. Búginde tehnıkalyq mamandyqtarǵa bólinetin memlekettik tapsyrys jyl saıyn ulǵaıyp keledi, stýdentterdiń shákirtaqysy eki esege artty. Sonymen qatar, bilim alýshylarǵa óz kásibin bastaýǵa, halyqaralyq sertıfıkattaýdan ótýge barlyq múmkindik qarastyrylǵan. Jastarǵa baǵyttalǵan iri jobalar men baǵdarlamalar — elimizdiń jarqyn bolashaǵyna jasalǵan ınvestıtsııa. Kásipti ıgergen adam — baqytyn tabady. Sondyqtan bul jyl sizder úshin úlken múmkindikter jyly, — dedi mınıstr.
Ekonomıkanyń túrli salalary úshin bilikti mamandardyń kadrlyq rezervin qalyptastyrý maqsatynda alǵash ret uıymdastyrylǵan bul baıqaýǵa elimizdegi tehnıkalyq jáne kásiptik bilim berý uıymdarynan 2 myńnan astam daryndy ári kásibı bilikti stýdent qatysty. Óńirlerde ótken irikteý kezeńderiniń nátıjesinde 200 úzdik stýdent respýblıkalyq kezeńge joldama alyp, olardyń arasynan 100 úzdik jas marapatqa ıe boldy. Baıqaý jeńimpazdary «Qazaqstan Respýblıkasynyń kolledjderiniń úzdik 100 stýdenti» derekter bazasyna engizilip, jumysqa ornalasý úshin arnaıy sertıfıkattarmen marapattaldy. Sonymen qatar olardyń úzdik jobalaryn júzege asyrýǵa qoldaý kórsetiletin bolady.
Aıta ketelik Qazaqstan ǵalymdarynyń jetistikteri Ulybrıtanııadan shyǵatyn bedeldi jýrnalda jarııalanǵan edi.