Elimizdiń qaı óńirinde alıment tóleýden jaltarǵandar kóp
ASTANA. KAZINFORM –Ádilet mınıstrliginiń resmı ókili Talǵat Ýálı elimizdiń qaı óńirinde alıment tóleýden jaltarǵandar kóp ekenin aıtty.
«2023 jyly alıment óndirip alý týraly 326 328 atqarýshylyq is júrgizildi. Onyń 16 197-si kúrdeli óndirister boldy. 7 545 alıment boıynsha 3 aıdan astam bereshek erikti túrde ishinara óteledi. Al 8 652 alıment boıynsha bereshek múldem ótelmeıdi. Al olar boıynsha bereshek somasy 20,7 mlrd teńgeni qurady. Sondaı-aq, jyl basynan beri alıment óndirip alý týraly 291 392 atqarýshylyq is júrgizilip jatyr. Onyń 12 345-i kúrdeli óndirister sanalady. 7 323 alıment boıynsha 3 aıdan astam bereshek erikti túrde ishinara óteledi, al 4 689 alıment boıynsha bereshek múlde ótelmeıdi. Bereshek somasy — 14,6 mlrd teńgege teń», — dedi Talǵat Ýálı.
Onyń aıtýynsha, alıment óndirisiniń basym bóligi Almaty oblysyna tıesili. Bul óńirde 2 579 azamattyń alıment bereshegi 1 mlrd 943 mln teńgeni quraıdy. Al Astana qalasynda 1 mlrd 877 mln teńgege — 1 802, Almaty qalasynda 528 mln teńgege — 1 145, Túrkistan oblysynda 2 mlrd 185 mln teńgege — 806, Shymkent qalasynda 1 mlrd 290 mln teńgege — 728, Qaraǵandy oblysynda 908 mln teńgege 592 óndiristik is bar. Al eń az kúrdeli alıment óndiristeri Ulytaý, Aqmola, Atyraý oblystaryna tıesili.
«2023 jylmen salystyrǵanda oń dınamıkany atap ótken jón. Máselen, Almaty oblysynda kúrdeli alımentterdiń jalpy sany 1 822 óndiriske kemip, 4 401 óndiristi, Qaraǵandy oblysynda 897 óndiriske kemip, 1 502 óndiristi, Astana qalasynda 475 óndiriske azaıyp, 2 277 óndiristi, Almaty qalasynda 183 óndiriske qysqaryp, 1 328 óndiristi qurap otyr», — dedi resmı ókil.
