Elimizdiń qaı aımaǵynda shekaradan zańsyz ótetinder kóp

PETROPAVL. KAZINFORM — Bıyl 4245 sheteldik elden shyǵarylsa, 148-i qylmystyq jaýapkershilikke tartylǵan. 

QR Ulttyq qaýipsizdik komıtetiniń málimetinshe, ásirese jyldyń jyly mezgilinde jáne túngi ýaqytta shekaradan zańsyz ótý faktileri jıi tirkeledi. Memlekettik shekara elimizdiń soltústigi men ońtústiginde jıi buzylady.

Bıyl 4245 sheteldik erkinen tys elden shyǵarylsa, 148-i qylmystyq jaýapkershilikke tartyldy. Quqyq buzýshylar kóbine memlekettik shekaranyń ótkizý pýnktin jaıaý nemese kólikpen aınalyp ótpek bolady.

Jaqynda Marokko Koroldiginiń eki azamaty Soltústik Qazaqstan oblysy arqyly zańsyz Reseıge ótpek bolǵan jerinen ustaldy. 

— Qoldanystaǵy vızasyz rejımdi paıdalanyp eki marokkolyq halyqaralyq áýejaılar arqyly Qazaqstanǵa jetken. Olar aldymen BAÁ, Túrkııa, Qatardan ótip, el aýmaǵyna Ázirbaıjan arqyly kirgen. Odan ári Reseıge ótý úshin kórshi memleketpen shekaralas oblys ortalyqtaryna jetedi. Sheteldikter kórshi memleketten ómir súrýge qolaıly meken tappasa, ári qaraı Eýropa elderine ketpek bolǵan, — delingen vedomstvonyń jaýabynda. 

Mamandardyń aıtýynsha, bıyl shekara qyzmetinde Qylmystyq kodekstiń 394-babynyń (zańsyz kóshi-qondy uıymdastyrý) 1-bóligi boıynsha — 8, 394-babynyń 2-bóligi boıynsha — 10 is tirkelgen.  

Jalpy bıyl elimizge kórshi Ózbekstannan shamamen 4,7 mln adam, Reseıden — 3 mln, Qyrǵyz elinen — 2,8 mln, QHR-dan — 790 myń, Tájikstannan — 731 myń adam kelgen.

Al Belarýs Respýblıkasynan — 139 myń adam, Úndistannan — 127 myń, Túrkııadan — 119 myń adam, Germanııadan — 88 myń jáne Ázerbaıjannan 83 myńnan astam sheteldik aıaq basqan eken. 

Buǵan deıin Qazaqstanǵa qaı elderden eńbek mıgranttary kóp keletinin jazǵan edik.