Elimizdiń eń kishkentaı patrıoty Túrkistan oblysynda turady
TALDYQORǴAN. KAZINFORM — Tiktok áleýmettik jelisine gımnniń daýsyn estı sala uıqysynan turyp, ánuranǵa qurmet kórsetken búldirshinniń jazbasy tarady. Az ýaqytta 1 mln asa qaralym jınaǵan jazbanyń astyna 10 myńnan asa jeli qoldanýshy pikir qaldyrdy.
Jelidegi jurttyń júregin eljiretken búldirshin Túrkistan oblysynda turady. Esimi Medına. 2 jasta. Úıdegi 3 balanyń ortanshysy. Kishkentaı patrıottyń bul qylyǵyn Tiktokqa ápkesi júktegen. Jeli qoldanýshylaryn súısintken jazba 6-7saǵattyń ishinde 1 mlnnan asa qaralym jınaǵan. 100 myńnan asa lúpil basylyp, 12 myńnan astam pikir jazyldy.
— Medına balabaqshaǵa barady. Vıdeony tańerteń anasy túsirgen bolatyn. Ánurandy qosqanda qyzym uıqysynan turyp, óziniń patrıottyq sezimin bildirgen eken. Áleýmettik jelide jaqsy pikir, tilekter jazyp jatyr. Ózim Ulttyq Ulan qolbasshylyǵynda qyzmet etemin. Qyzymnyń osyndaı patrıottyq sezimin kórip, ózimniń de jumysyma degen qulshynysym odan ári artyp jatyr. Shynymyzdy aıtsaq bulaı bolyp ketedi oılamadyq, jaı túsirilim bolǵan edi. Sizderge de osyndaı sábı juǵysty bolsyn, — dedi ákesi Rahat Qurmanbaı.
Eske salaıyq osyǵan deıin Táýelsiz Qazaqstannyń Olımpıada oıyndaryndaǵy alǵashqy tý ustaýshysy kim ekenin jazǵanbyz.