Elimizdiń densaýlyq saqtaý júıesinde meıirgerlerdiń róli edáýir artty - DSM
ASTANA. KAZINFORM - Búgin, 12 mamyr, Qazaqstanda jáne búkil álemde Halyqaralyq meıirger kúni – 141 eldiń meıirgerler qaýymdastyǵyn biriktiretin kásibı mereke atalyp ótip jatyr.
QR Densaýlyq saqtaý mınıstrligi baspasóz qyzmetiniń habarlaýynsha, búginde elimizdiń densaýlyq saqtaý júıesinde 190 myńnan astam orta býyn medıtsına qyzmetkeri, olardyń 146 myńnan astamy – meıirger jumys isteıdi, al aýyldyq jerlerde shamamen 55 myń maman eńbek etýde.
Sońǵy jyldary elimizdiń densaýlyq saqtaý júıesinde meıirgerlerdiń róli edáýir artty. Qyzmet aıasyn keńeıtý jáne ókilettikterdi berý arqyly meıirgerler medıtsınalyq kómekti komandalyq úlgide kórsetý júıesiniń ajyramas bóligine aınaldy.
Bul dárigerlerdiń júktemesin azaıtýǵa, patsıentter aǵynyn tıimdi úılestirýge, sondaı-aq medıtsınalyq qyzmetterdiń qoljetimdiligi men sapasyn arttyrýǵa múmkindik berdi.
Búginde keńeıtilgen praktıka meıirgerleri óz betinshe kelesi qyzmetterdi atqarady:
• patsıentterdi bastapqy qabyldaý jáne dınamıkalyq baqylaý;
• medıtsınalyq qujattar men elektrondyq jazbalardy júrgizý;
• dárigerdiń taǵaıyndaýy boıynsha aqparattyq júıeler arqyly tegin retsept jazý;
• patsıentter aǵynyn retteý jáne suryptaý, qabyldaýǵa jazý;
• aktıvterdi tirkeý jáne turǵyndardy MSAK uıymdaryna tirkeý.
Meıirgerlerdiń jaýapkershilik salasyna sonymen qatar:
• dıspanserlik eseptegi patsıenttermen jumys;
• sozylmaly aýrýlardy basqarý baǵdarlamasy jáne ámbebap-progressıvti patronaj modeli sheńberinde konsýltatsııa berý, oqytý jáne patronaj;
• vaktsınatsııalaý men skrınıngterdi qosa alǵanda profılaktıka sharalary;
• medıtsınalyq kómek kórsetýdiń barlyq deńgeıdegi halyqtyń densaýlyǵyn nyǵaıtýǵa qatysý jatady.
Densaýlyq saqtaý mınıstrligi mamandardy daıarlaýdyń satyly júıesin engizdi: standartty deńgeıden bastap mamandardyń quzyretterine qoıylatyn talaptarǵa sáıkes keletin «bakalavrıat – magıstratýra – doktorantýra» akademııalyq dárejelerine deıin.
Qazaqstanda meıirgerlerdi 94 medıtsınalyq kolledj daıarlaıdy, onyń ishinde 22-si – memlekettik, 72-si – jekemenshik. Olardyń 39-y – joǵary medıtsınalyq kolledj mártebesine ıe.
Jyl saıyn elimizde 23 000-nan astam jalpy beıindi maman daıarlanady, al sońǵy alty jyldyń ishinde qoldanbaly bakalavrıat dıplomy bar 20 000-nan astam meıirger densaýlyq saqtaý mekemelerine jumysqa ornalastyryldy.
Meıirger isin damytý jumystaryn úılestirý maqsatynda elimizdiń 20 óńirinde óńirlik úılestirýshiler taǵaıyndaldy. Olardyń qatarynda – praktıkalyq densaýlyq saqtaý salasynyń, bilim berý uıymdarynyń jáne basqarý organdarynyń ókilderi bar.
- Qazaqstan Respýblıkasy Densaýlyq saqtaý mınıstrligi barlyq meıirgerlerge halyqtyń densaýlyǵyn saqtaý isine qosqan baǵa jetpes úlesi, biliktiligi, janashyrlyǵy men adaldyǵy úshin shyn júrekten alǵys bildiredi. Tek meıirgerler ǵana árqashan patsıenttiń janynan tabylady, ómirdiń eń qıyn ári jaýapty sátterinde qoldaý kórsetedi, - delingen habarlamada.
Sondaı-aq onda kásibı merekege baılanysty 14-16 mamyr kúnderi Túrkistan qalasynda «Meıirger qyzmetiniń ınnovatsııalary men damý perspektıvalary» atty halyqaralyq forým jáne Qyzylorda qalasynda «QR-da táýelsiz meıirger isiniń eń úzdik praktıkalaryn engizý» taqyrybynda halyqaralyq ǵylymı-praktıkalyq konferentsııa ótetin aıtylǵan.
Osyǵan deıin Oljas Bektenov Úkimettiń densaýlyq saqtaýdy jetildirý boıynsha barlyq sharany qabyldap jatqany týraly aıtqan bolatyn.