Elimizdiń 6 óńirinde sý basqan úılerdiń sany 4 myńnan asty
ASTANA. KAZINFORM – Elimizdiń 6 óńirinde sý basqan úılerdiń sany 4 myńnan asty. Bul týraly TJM azamattyq qorǵanys jáne áskerı bólimder komıtetiniń aǵa ofıtseri Erasyl Saıpash aıtty.
«Sý tasqyny bastalǵaly beri 103 500 adam, onyń ishinde 37 703 bala qaýipsiz jerlerge jetkizildi. 10 163 adam úılerine oraldy. Ýaqytsha ornalasý pýnkterine 6 810 adam, onyń ishinde 3 075 bala ornalasty. 9,2 mln tekshe metr erigen qar sýy soryp shyǵaryldy, 1,8 mln qapshyq jáne 1,2 mln tonna ınertti materıal tóseldi. Búgingi tańda avarııalyq-qutqarý jumystarynda 30 629 adam, 3 529 tehnıka, 678 sý sorý quraly, 198 júzý quraly, 11 áýe kemesi jumyldyryldy», - dedi ol Ortalyq kommýnıkatsııalar qyzmetindegi brıfıngide.
Onyń aıtýynsha, «jedel jeli» telefonyna 1 568 qońyraý túsip, psıhologtar zardap shekken adamdarǵa pıshologııalyq kómek kórsetýde.
«Osy saǵatta Aqtóbe, Qostanaı, Aqmola, Atyraý, Soltústik Qazaqstan, Shyǵys Qazaqstan oblystarynda 4 040 jeke turǵyn úı, 1 155 aýla aýmaǵy jáne 2 037 saıajaı úıleri sý astynda qalýda. 3 262 turǵyn úı men 2 036 aýla aýmaǵynan sý buryldy. Muz keptelisteriniń aldyn alý maqsatynda Aqmola oblysynyń Sandyqtaý aýdanynda, Soltústik Qazaqstan oblysynyń Petropavl qalasynda Jabaı, Esil, Sarqyrama ózenderinde muz jarý jumystary júrgizildi. Boqsyq, Qalqutan, Esil, Torǵaı ózenderinde sý deńgeıiniń kóterilýine baılanysty Aqmola oblysynyń Bulandy, Astrahan aýdandarynyń tórt eldi mekeninde, Soltústik Qazaqstan oblysy Petropavl qalasy men Qyzyljar aýdanynyń eki eldi mekeninde, Aqtóbe oblysy Yrǵyz aýdanynyń eki eldi mekeninde 850 adam aldyn ala evakýatsııalandy», - dedi Erasyl Saıpysh.
Onyń dereginshe, elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 36 TJ áreket etedi.
«TJM azamattardy asa muqııat bolýǵa, sý tasqyny kezeńinde qaýipsizdik sharalaryn múltiksiz saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady», - dedi ol.
Buǵan deıin 6 óńirde 4 myńǵa jýyq úı sý astynda qalǵanyn jazǵan edik.
