Elimizden byltyrdan beri 10,2 mln tonna astyq eksporttaldy

ASTANA. KAZINFORM — 2024–2025 jyldary marketıngtik kezeńde 10,2 mln tonna astyq eksporttaldy. Bul týraly Aýyl sharýashylyǵy mınıstrligi habarlaıdy.

— 2024 jylǵy qyrkúıekten 2025 jylǵy tamyzǵa deıingi marketıngtik kezeńde temir jol arqyly barlyǵy 13,3 mln tonna astyq tasymaldanyp, sonyń ishinde 10,2 mln tonnasy eksportqa baǵyttaldy. Osy ýaqyt aralyǵynda 1670 astyq marshrýty jasaqtalyp, jóneltildi. Negizgi eksporttyq baǵyttar – Qytaı, Ortalyq Azııa elderi jáne Aqtaý porty. Tasymaldaýdy qamtamasyz etý úshin shamamen 13,8 myń mamandandyrylǵan astyq vagony paıdalanyldy. Bul kórsetkish ótken jyldyń sáıkes kezeńimen salystyrǵanda 20%-ǵa joǵary. Sondaı-aq 16,5 myń jabyq vagon men TMD elderi operatorlarynyń 2 myńnan astam vagony tartyldy, — delingen mınıstrlik aqparatynda.

«Qazaqstan temir joly» Dostyq – Moıynty, Beıneý – Aqtaý, Jetigen – Altynkól, Semeı – Pavlodar jáne basqa da negizgi temir jol baǵyttaryn jańǵyrtýǵa arnalǵan aýqymdy baǵdarlamany iske asyryp jatyr. Bul jobalar jeliniń ótkizý qabiletin arttyrýǵa jáne tasymaldaý tıimdiligin kóterýge baǵyttalǵan.

Logıstıkalyq úderisterdi jedel úılestirý úshin kompanııada astyq shtaby jumys isteıdi, sondaı-aq óńirlik bólimshelerde arnaıy astyq toptary qurylǵan.

Aıta keteıik, Qazaqstanda qazirgi tańda shamamen 9,5 mln tonna astyq bastyryldy.