Elimizdegi kásibı fýtbol jarystaryn ótkizý quqyǵynyń QFF-ǵa qaıtarylýynyń tıimdiligi qandaı
ASTANA. KAZINFORM - QFF elimizdegi kásibı fýtbol jarystaryn ótkizý quqyǵyn Qazaqstan fýtbol federatsııasyna qaıtarýǵa qatysty pikirin bildirdi.
Federatsııanyń aıtýynsha, bul - basqarýdy ońtaılandyryp, jarystardy ótkizýdiń ashyqtyǵy men tıimdiligin arttyrýǵa baǵyttalǵan qadam.
- Sońǵy jyldary chempıonattarǵa qatysý úshin tólenetin joǵary jarna klýbtarǵa qarjylyq aýyrtpalyqty kúsheıtti. Osyǵan baılanysty Qazaqstan fýtbol federatsııasy (QFF) bul jarnalardy 10%-ǵa tómendetý týraly sheshim qabyldady. Bul ózgeris reformanyń alǵashqy qadamy retinde qarastyrylyp otyr. Aldaǵy ýaqytta jaǵdaıǵa qaraı osy baǵyttaǵy jumystar jalǵasady. Jarnalardyń azaıýy klýbtarǵa qarjylyq qıyndyqtarǵa alańdamaı, jarystarǵa belsendi qatysýǵa múmkindik beredi, - dep atap ótti federatsııa.
Oǵan qosa keleshekte fýtbol ınfraqurylymyn reformalaýdaǵy mańyzdy qadamdardyń biri – tóreshilerdi qarjylandyrý júıesin ózgertýge kóńil bólinedi. Buǵan deıin matchtaǵy tóreshilerge ketetin shyǵyndardy qabyldaýshy klýb óz moınyna alatyn. Al bul komandalarǵa qosymsha salmaq túsiretin.
- Endi bul shyǵyndy Qazaqstan fýtbol federatsııasy (QFF) óz esebinen jabady. Bul ózgeris klýbtardyń qarjylyq júktemesin azaıtyp qana qoımaı, tóreshilik júıeniń ashyqtyǵyn qamtamasyz etip, múmkin bolatyn múddeler qaqtyǵysyn boldyrmaýǵa septigin tıgizedi.
Reforma aıasynda tóreshilerge qatysty taǵy bir ózgeris engizilmek – endi olardyń esimderi tek match kúni jarııalanady. Bul sheshim tóreshilerge oıynǵa deıingi qysymdy azaıtyp, syrtqy yqpaldan qorǵaýǵa baǵyttalǵan. Osylaısha, arbıtrler óz mindetin barynsha obektıvti ári táýelsiz atqara alady, - dep tolyqtyrdy federatsııa.
Kásibı fýtbol jarystaryn uıymdastyrý quqyǵynyń QFF-ǵa qaıtarylýynyń taǵy bir mańyzdy qyry – matchtardyń translıatsııa sapasyn aıtarlyqtaı jaqsartý jáne medıa múmkindikterdi keńeıtý.
- Ózgerister sporttyq jaǵyna ǵana emes, kórermender úshin translıatsııalardy tartymdy etýge de baǵyttalǵan. Bul eń aldymen tehnıkalyq sapany jaqsartýdy qamtıdy: beıne sapasyn arttyrý, operatorlar men rejısserlerdiń kásibı jumysyn jetildirý, sondaı-aq zamanaýı tehnologııalardy paıdalaný arqyly jankúıerlerge oıyn barysyn meılinshe joǵary deńgeıde usyný.
Mundaı qadam kórermenderdiń qyzyǵýshylyǵyn arttyryp qana qoımaı, fýtbolǵa jańa jankúıerlerdi tartýǵa da yqpal etedi. Buǵan deıin kórermender matchtardyń sapasyz kórsetilimi men jalpy medıa qoldaýdyń álsizdigine jıi shaǵymdanǵan edi. Reformanyń basym baǵyttarynyń biri – osy máselelerdi túbegeıli sheship, fýtboldyń kórermenge qoljetimdiligin arttyrý.
Sonymen qatar, bul ózgerister klýbtar men chempıonattardyń túrli platformalarda – dástúrli telearnalarda da, onlaın keńistikte de belsendiligin arttyrýdy qamtıdy. Fýtbol oqıǵalarynyń áleýmettik jeliler, mobıldi qosymshalar jáne basqa da arnalar arqyly keńinen taralýy klýbtar, oıynshylar jáne jankúıerler arasyndaǵy baılanysty nyǵaıtýǵa múmkindik beredi, - dep habarlady federatsııa.
Munda tek qaralym sanyn kóbeıtý ǵana emes, jankúıerlerge komandamen tikeleı qarym-qatynas jasaý, pikir bildirý, eksklıýzıvti kontentke qol jetkizý múmkindigin berý de mańyzdy ról atqarady.
Bul ózgerister fýtbolǵa degen qyzyǵýshylyqty arttyryp, jankúıerlerdiń oıynshylar men klýbtarǵa jaqyndaı túsýine yqpal etedi. Jalpy, bul reformalar otandyq fýtboldyń damýyna jańa serpin berip, klýbtardyń qarjylyq turaqtylyǵyn nyǵaıtýǵa jáne tóreshiler júıesine degen senimdi arttyrýǵa yqpal etedi. Bul ózgerister elde fýtboldyń odan ári damýy men tanymaldylyǵyn arttyrý úshin mańyzdy.
Federatsııa negizgi maqsaty – jarystardy uıymdastyrý men basqarýǵa barynsha qolaıly jaǵdaı jasaý dep sanaıdy. Qabyldanǵan sheshim strategııalyq maqsattarǵa qol jetkizýge jáne Qazaqstandaǵy fýtbol protsesterin basqarýdyń tıimdiligin arttyrýǵa baǵyttalǵan, - dep jazylǵan habarlamada.
Eske salsaq, ótken jyldyń jeltoqsan aıynda Qazaqstan fýtbol federatsııasynyń jańa prezıdenti taǵaıyndaldy.