Elimizdegi avtomektepterde oqý baǵasy qansha

ASTANA. KAZINFORM – Avtomektepter oqý protsesi kezinde jol erejesin teorııa júzinde úırenip qana, kólik aıdaýdy úıretedi, dep habarlaıdy Kazinform agenttigi. 

Baǵany durys salystyrý úshin biz salmaǵy 3,5 tonna bolatyn jeńil kólikti júrgizýge arnalǵan «B» sanatty kýáliginiń oqý aqysyn bildik. Qalalarda oqý merzimi — 2-3 aı. Bir aıdan soń bilim alýshylar qala ishinde nemese avtodromda nusqaýshy kómegimen kólik júrgize alady. Oqý aqysyn salystyrý kezinde kýrs jáne nusqaýshymen 18 saǵat kólik júrgizý negizge alyndy.

Eń qymbat kýrs Almaty qalasynda bolyp shyqty. Munda jeńil kólik júrgizý kýrsy 70 000 teńgeden bastalyp, 150 000 teńgege jetedi. Munda kýrs quny orta eseppen 110 000 teńge. Al nusqaýshymen bir saǵat kólik júrgizý quny — 10 000 teńge. Eger 18 saǵattyń shyǵynyn qossaq, 180 000 teńge bolady. Kýrs pen kólik júrgizýdi qatar úırený — 290 000 teńge.

Aqtaýda baǵa budan 38 000 teńgege arzan. Biraq «B» sanatty kýáligin alýǵa arnalǵan kýrstyń tolyq quny sonda da 252 000 teńgege shyǵyp tur. Onyń 90 myń teńgesi oqý aqysy, al 162 000 teńge (nusqaýshymen birge 1 saǵat kólik aıdaý quny 9 000 teńge) kólik júrgizýge ketedi.

Astana qalasynda da tańdaý kóp. Keıbir avtomektepterde kýrs quny 60 000 teńge, al keıbirinde 120 000 teńge bolyp tur. Avtomektepterde kólik júrgizýdi úırený quny 6 000 teńgeden bastalyp, 10 000 teńgege deıin jetedi. Qalada oqý kýrsy orta eseppen 80 000 teńge. Sonymen birge nusqaýshymen kólik júrgizý úshin ár saǵaty 8 000 teńge. Bul degenimiz — 18 saǵattyq oqýǵa 144 000 teńge kerek. Kýrstan tolyq ótý quny — 224 000 teńge.

Qonaev qalasynda baǵa sál tómen. Kýrstyń jalpy quny 215 000 teńge. Onyń 80 000 teńgesi oqýǵa, 135 000 teńgesi kólik júrgizýge (saǵatyna 7500 teńge) jumsalady. Atyraýda baǵa edáýir tómen. Munda kýrstyń jalpy quny — 199 000 teńge. Onyń 55 000 teńgesi kýrsqa jumsalady. Al nusqaýshymen birge kólik júrgizý úshin ár saǵatyna 8 000 teńge tóleýge týra keledi.

Taldyqorǵan men Shymkentte kýrs quny 60 000 teńge bolyp tur. Biraq Taldyqorǵanda kólik júrgizýdi úırený úshin 126 000 teńge (saǵatyna 7000 teńge) tóleýge týra keledi. Al Shymkentte onyń quny 108 000 teńge (saǵatyna 6000 teńge) dep eseptelgen. Oralda 2,5 aılyq kýrsty oqý úshin 70 000 teńge jáne kólik júrgizip úırený úshin saǵatyna 6 000 teńge tóleıdi.

Kókshetaýda avtomektepte oqý baǵasy joǵary. Munda 75 000 teńge, biraq praktıkalyq oqý baǵasy tómen. Saǵatyna 5000 teńge bolsa, tolyq kýrsqa 165 000 teńge tóleıdi.

Qyzylorda men Tarazda kýrs baǵasy — 50 000 teńge. Al nusqaýshymen birge kólik júrgizip úırenýge 5 000 teńge tóleıdi. Tolyq kýrs — 140 000 teńge.

Jezqazǵan men Qaraǵandyda teorııalyq bilim alý, jol erejesin úırený 40 000 jáne 35 000 teńge. Al kólik rýline otyryp, júrgizip úırený saǵatyna 5 500 teńge (18 saǵattyq oqý quny — 99 000 teńge) bolyp tur.

Óskemen (137 000 teńge) men Qostanaıda (126 000 teńge) baǵa shamalas. Munda oqý aqysy orta eseppen 45-47,5 myń teńge. Al Qostanaıda kólik júrgizýdi úırený 500 teńgege (birinde 4500, ekinshisinde 5 000 teńge) arzan.

Petropavl men Túrkistanda baǵa ortashadan tómen. Eger ońtústikte 50 000 teńge bolsa, soltústikte 60 000 teńge. Al kólik júrgizýdi úırený úshin qalalyqtar saǵatyna 4 000 teńge (18 saǵatqa 72 000 teńge) tóleıdi.

Tolyq kýrs baǵasy arzan úshtikke Pavlodar qalasy kirip tur. Munda nusqaýshymen birge kólik júrgizý úshin saǵatyna 2 500 teńge tóleıdi. Tek teorııalyq kýrs quny Astanadaǵy baǵamen birdeı, ıaǵnı, 80 000 teńge. Degenmen kýrs quny orta eseppen 125 000 teńgege shyǵady.

Aqtóbede teorııa men praktıka quny shamalas. Biri 60, ekinshisi 63 myń teńge (munda kólik júrgizý 3500 teńge) turady.

Elimizde Semeı qalasynda ǵana eń tómen baǵa usynylady. Munda kýrstyń teorııalyq bóligi 40 000 teńge, al kólik júrgizý úshin saǵatyna 4 000 teńge (barlyǵy 72 000 teńge) tóleıdi. Sonda tolyq kýrs quny — 112 000 teńge.

Buǵan deıin Qazaqstanda jyljymaıtyn múlikti saqtandyrý quny qansha turatynyn bildik.