Elimizdegi 3 óńirdiń sý energetıkalyq áleýeti zertteledi
ASTANA. KAZINFORM - Sý elektr stantsııalaryn salý úshin Qazaqstannyń úsh óńiriniń sý energetıkalyq áleýeti zerttelmek. Konsýltatsııalyq qyzmetterdi Azııa damý banki qarjylandyrady. Qazaqstannyń energetıka mınıstri Londonda qarjy ınstıtýtynyń ókilderimen kezdesip, osy týraly kelisimge qol qoıdy, dep habarlaıdy Kazinform tilshisi.
Ertis-Zaısan, Alakól jáne Balqash basseınderiniń sý energetıkalyq áleýeti zor. Ol óńirlerde shaǵyn jáne orta sý elektr stantsııalaryn salý josparlanyp otyr. Qurylystyń sapaly júrgizilýi úshin aldymen saraptamalyq taldaý qajet.
“Sý stantsııalarynyń qurylysy taza elektr energııasyn óndirý úshin mańyzdy. Budan bólek sýdy únemdeý, tirshilik kózimen qamtamasyz etýdegi kómegi kóp,” - dedi QR Energetıka mınıstri Almasadam Sátqalıev.
Jobany júzege asyrýǵa Azııa damý banki arnaıy grant qarastyryp otyr. Atap aıtqanda áleýetti ýchaskelerdi zertteýge, qarjy-ekonomıkalyq modelin jasaýǵa jáne tarıfter boıynsha esepteýler júrgizýge qarajat bólmek.
“Azııa damý banki 2060-jylǵa qaraı kómirtegi beıtaraptyǵyna qol jetkizýdi maqsat etken Qazaqstan úkimetiniń órshil josparyn joǵary baǵalaıdy. Basqa da jobalardy júzege asyrýǵa kómektesýge yntalymyz,” - dedi Azııa damý banki keńsesiniń aǵa dırektory Fýmıko Kavavakı.
Qýaty 600 MVt-tyq sý elektr stantsııasyn salý boıynsha alǵashqy aýktsıonǵa qazaqstandyq jáne halyqaralyq ınvestorlar tartylmaq. Banktiń grantyn bólý sharasy ashyq ári ádil ótetindikten qatysýshylar tarapynan suranys kóp bolady dep úmittenedi uıymdastyrýshylar.
