Elimizde jumyrtqa arzandady
ASTANA. KAZINFORM – Ulttyq statıstıka bıýrosynyń derekteri boıynsha bıylǵy 15 sáýirdegi jaǵdaı boıynsha respýblıka boıynsha jyl basynan beri ÁMAT baǵasynyń turaqty deńgeıi saqtalyp otyr. Birneshe taýar sanattary boıynsha baǵanyń turaqty tómendeýi tirkeldi.
Máselen, bıylǵy jyldyń basynan bastap jumyrtqa baǵasy 3,0% — ǵa tómendedi. Bul taýar halyqtyń ratsıonyndaǵy negizgi taýarlardyń biri jáne onyń turaqty baǵa dınamıkasy úkimet pen bıznestiń birlesken jumysynyń nátıjesi.
— Bıylǵy jyldyń aqpan aıynda Saýda jáne ıntegratsııa mınıstrligi, salalyq qaýymdastyqtar jáne saýda jelileriniń ókilderi arasynda memorandýmǵa qol qoıyldy. Oǵan sáıkes S1 sanatyndaǵy jumyrtqanyń maksımaldy satý baǵasy QQS esebimen bir danasyna 55 teńgeden aspaıtyn kólemde belgilendi. Kelisim sheńberinde sondaı-aq shekti saýda ústemesiniń saqtalýy jáne qosymsha ústemeaqylardyń alynyp tastalýy qamtamasyz etiledi, — delingen Saýda komıteti habarlamasynda.
Osy sharalardyń arqasynda sáýir aıynda jumyrtqa baǵasynyń ındeksi turaqty bolyp qaldy, al sońǵy aptanyń qorytyndysy boıynsha (8-15 sáýir aralyǵynda) baǵa ózgermedi. Mysaly, 2025 jyldyń qańtar aıynda S1 sanatyndaǵy 10 jumyrtqanyń ortasha baǵasy 548 teńge, aqpanda — 546 teńge, naýryzda — 536 teńge, al sáýirde — 531 teńge boldy.
Sonymen qatar, arzandaǵan taýarlar:
— Kúrish — jyl basynan beri 4,7% — ǵa tómendedi,
— Un — 1,8%,
— Qaraqumyq jarmasy — 0,3%.
Súzbe, kúnbaǵys maıy jáne rojkı sııaqty mańyzdy ónimderdiń turaqty baǵasy baıqalady — sońǵy aptanyń qorytyndysy boıynsha baǵa ındeksteri ózgerissiz qaldy nemese 0,1% shamaly aýytqýdy kórsetti.
Sonymen qatar, kókónis baǵasynyń ortasha qymbattaýy baıqalady: qyryqqabat — 3,5%, sábiz — 1,6%, pııaz — 1,8% jáne kartop-1,7%. Kókónis tobyndaǵy baǵanyń ósýi maýsymdyq kezeńge baılanysty. Ádette maýsymaralyq saqtaý men logıstıka shyǵyndarynyń artýyna oraı kókónis baǵasynda ózgerister bolady.
Aıta ketelik eń joǵary azyq-túlik baǵasynyń ósýi Aqmola oblysynda. Eń tómen ósim Jambyl, Qostanaı jáne Túrkistan oblystarynda tirkelgen edi.