Prezıdent tapsyrmasy: Jylqy sharýashylyǵy ınstıtýty quryldy
ASTANA. KAZINFORM - Elimizde «Qazaq jylqy sharýashylyǵy jáne jemshóp óndirý ǵylymı-zertteý ınstıtýty» quryldy. Bul týraly AShM habarlady.
«15 qarashada Astana qalasynda ótken aýyl sharýashylyǵy qyzmetkerleriniń birinshi forýmy aıasynda Memleket basshysy Úkimetke Jylqy sharýashylyǵy ınstıtýtyn qurýdy tapsyrdy. Prezıdent Qasym-Jomart Toqaevtyń tapsyrmasyn oryndaý maqsatynda Aqtóbe aýyl sharýashylyǵy tájirıbe stansasynyń negizinde „Qazaq jylqy sharýashylyǵy jáne jemshóp óndirý ǵylymı-zertteý ınstıtýty“ JShS quryldy. Aıta keteıik, mekeme „Ulttyq ǵylymı-bilim berý ortalyǵy“ quramynda. Jańa qurylǵan ınstıtýttyń jumysy — asyl tuqymdy jylqylardyń sapasyn jaqsartýǵa, jylqy sharýashylyǵyn belsendi damytýǵa, ǵylymı-zertteý jumystaryn júrgizýge jáne otandyq tuqymdy syrtqy naryqqa shyǵarýǵa baǵyttalǵan. Aldaǵy bes jylda asyl tuqymdy jylqy sanyn 6-7 paıyzǵa arttyrý kódelip otyr», — delingen mınıstrlik habarlamasynda. Jergilikti qostanaı, adaı jáne soǵymǵa arnalǵan muǵaljar, jábe, kúshim genotıpterin kóbeıtý úshin sellektsııalyq jáne asyldandyrý baǵytynda jumystar belsendi júrgizilmek. Ol úshin jylqylardyń ártúrli genetıkalyq toptary týraly aqparatty saqtaıtyn derekter qoryn jáne uryqtar men embrıondar banki qurylmaq», — delingen habarlamada.
Sondaı-aq, bıelerdi qoldan uryqtandyrý zerthanalyq pýnktin salyp, arnaıy jylqy ósirýshi mamandaryn daıyndaý josparlanyp otyr. Arnaıy jylqy veterınarlyq klınıkasyn ashý arqyly veterınarııalyq qyzmet kórsetý deńgeıiniń sapasy jaqsarady — deıdi mamandar.
AShM habarlaýynsha, 2035 jylǵa deıin jylqy sharýashylyǵynda ǵylymı zertteýlerdiń basym baǵyttarynyń biri otandyq popýlıatsııadaǵy jylqylardyń genetıkalyq áleýetin selektsııalyq, tehnologııalyq ádistermen arttyryp, Qazaqstannyń ártúrli óńirleriniń taýar sharýashylyqtaryna keńinen engizý. Munyń bári ósiriletin tuqymdardyń ónimdiliginiń 20-25%-ǵa ósýin qamtamasyz etedi.
Belgilengen josparlardy iske asyrýdyń negizgi sharttarynyń biri sheteldik ǵylymı-zertteý ortalyqtarymen, ýnıversıtettermen jáne halyqaralyq standartqa saı zerthanalarymen birlese jumys isteý. Birlesken ǵylymı-tehnıkalyq baǵdarlamalardy iske asyrý jáne sheteldik áriptestermen aqparat almasý arqyly elimizdiń jylqy sharýashylyǵyna ozyq tájirıbelerdi engizýge jáne ony halyqaralyq arenada básekege qabiletti etýge múmkindik bar.
