Elimizde jasandy ıntellekt ulttyq ortalyǵy ashylady
ASTANA. KAZINFORM — Qazaqstanda jasandy ıntellekt ulttyq ortalyǵy ashylady. Bul týraly Prezıdenttiń keńesshisi Qýanyshbek Esekeev málimdedi.
«Jaqynda biz Tsıfrlyq damý, ınnovatsııalar jáne aeroǵarysh ónerkásibi jáne Astana Hub áriptesterimen birge Qazaqstan Respýblıkasynda jasandy ıntellektti damytý tujyrymdamasy sheńberinde derekterdi óńdeý ortalyǵy men sýperkompıýter salý jobasy boıynsha jumys tobynyń otyrysyn ótkizdik. Bul platformanyń maqsaty — Qazaqstan ekonomıkasyn damytý úshin tehnologııalardy tıimdi engizý jáne AI áleýetin barynsha tolyq paıdalaný. Osy tujyrymdamanyń aıasynda AI ulttyq ortalyǵyn ashý josparlanýda. Jobanyń mıssııasy — aldaǵy jyldarda Qazaqstannyń AI transformatsııasyn júzege asyrý», — dep jazdy áleýmettik jelide Esekeev.
Onyń aıtýynsha, AI-diń ulttyq ekonomıka men qoǵamǵa ıntegratsııasy — turaqty damýdy saqtaýdyń jáne bolashaqtyń syn-qaterlerine daıyndalýdyń qajetti sharty bolyp sanalady. Memlekettiń AI ulttyq ortalyǵyn ashý jónindegi josparlary — bilim berý, ınfraqurylymdy damytý, venchýrlyq ınvestıtsııalar, sondaı-aq IT sheshimderiniń eksportyn qoldaý salasyndaǵy birqatar negizgi bastamasyn qamtıdy. Osy joba aıasynda kelesi bastamalardy qamtıtyn jol kartasy ázirlendi:
- AI salasyndaǵy negizgi jobalar men zertteýlerde yntymaqtasý úshin bilim berý mekemelerin, zertteý zerthanalaryn, startaptar men tehnologııalyq mekemelerdi biriktiretin AI kampýsy;
- YNOV, 01EduSystem jáne Tumo mektepteriniń ozyq tájirıbesin eskere otyryp ázirlenetin oqý baǵdarlamalaryn qoldanyp, oqýshylar men stýdentter arasynda AI mamandaryn daıarlaý;
- Oqý kýrstary, sheberlik sabaqtary jáne jelilik is-sharalar arqyly AI qaýymdastyǵyn damytýǵa úles qosatyn P2P akademııasyn ashý.
Bul bastamalar elimizde ınnovatsııalyq damýǵa, bilim men oqytý deńgeıin arttyrýǵa, sondaı-aq jahandyq AI ındýstrııasyndaǵy elimizdiń pozıtsııasyn nyǵaıtýǵa yqpal etetin turaqty AI ekojúıesin qurýǵa baǵyttalǵan.
