Elimizde Jasandy ıntellekt ınstıtýty ashylmaq
ASTANA. KAZINFORM – Jasandy ıntellekt quraldarynyń yqtımal teris áserin boldyrmaýǵa baǵyttalǵan jańa reglamentter men ádistemelik usynymdar ázirlenedi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Pedagogterdiń tsıfrlyq quzyrettiligin arttyrý maqsatynda arnaıy daıarlyq kýrstary uıymdastyrylyp jatyr. Búginde 160 myńǵa jýyq pedagog oqý protsesinde jasandy ıntellektini qoldaný boıynsha oqytýdan ótti (2024 jyly – 90 myńǵa jýyq, 2025 jyly – 70 myń). Oqý-aǵartý mınıstrligi Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, 2025 jyldyń qańtar aıynan elimizdiń 180 mektebinde orta bilim berý uıymdarynyń oqýshylary úshin baǵdarlamalaý negizderin oqytý kýrsy jónindegi pılottyq jobany júrgizip jatyr. Pılottyq mektepterdiń 10-11 synyp oqýshylary úshin oqý josparynyń varıatıvtik komponenti esebinen baǵdarlamalaý negizderi boıynsha kýrstar engizildi, - dedi Úkimet basshysy.
Premer-Mınıstrdiń dereginshe, pılottyq joba aıasynda 2024 jylǵy 16 shildeden, bastap nFactorial jáne Omnium IT-mektepterinde jasandy ıntellekt jáne Game Development baǵyttary boıynsha 180 pedagog jáne «Órleý» biliktilikti arttyrý ulttyq ortalyǵynyń 120 jattyqtyrýshysy arnaıy oqytý kýrstarynan ótti.
- Onyń ústine Y.Altynsarın atyndaǵy Ulttyq bilim akademııasymen (budan ári – Akademııa) oqýshylardyń bilimin baǵalaý jáne akademııalyq adaldyq talaptaryn jańartý aıasynda jasandy ıntellekt quraldarynyń yqtımal teris áserin boldyrmaýǵa baǵyttalǵan jańa reglamentter men ádistemelik usynymdar ázirlenin bolady. Sonymen qatar akademııa janynan jasandy ıntellektini bilim berý júıesine engizý jáne damytý boıynsha ádistemelik, zertteý, etıkalyq jáne oqý baǵdarlamalaryn úılestirý úshin Jasandy ıntellekt ınstıtýtyn ashý josparlanyp otyr, - dedi Oljas Bektenov.
Aıta keteıik, elimizde segiz sala boıynsha mamandar daıarlaý úshin JI qoldanatyn kásibı standart ázirlenip jatyr.