Elimizde zańǵa qaıshy kontent kólemi eki ese ósti — Balaeva
ASTANA. KAZINFORM — Mádenıet jáne aqparat mınıstri Aıda Balaeva jelilik resýrstardyń ákimshileri men jeli qoldanýshylaryna úndeý joldady.
Onyń sózinshe, qazirgi ýaqytta ınternet keńistiginde birqatar ózekti máseleler qyzý talqylanýda.
— Monıtorıng kórsetkendeı, onlaın-platformalarda kóbinese zańǵa qaıshy, qarapaıym tilmen aıtqanda, shyndyqqa janaspaıtyn aqparat jıi taralady. Osyǵan baılanysty jelilik resýrstardyń ákimshilerin jańalyqtar aǵynyn muqııat qadaǵalap, rastalmaǵan aqparattyń taralýyna jol bermeýge jáne zańǵa qaıshy kontentti joıýǵa shaqyramyn. Áleýmettik jeli qoldanýshylarynan da oılanbaı áreket etpeýdi, sondaı-aq zań talaptaryna sáıkes onlaın-platformanyń buǵattalýy múmkin jazbalar men pikirler qaldyrmaýdy suraımyn. Mıllıondaǵan azamat jańalyqtardy onlaın platformalardan alatynyn eskere otyryp, bizdiń mınıstrlik tyıym salý sharalaryna sırek júginetinin atap ótkim keledi. Degenmen, jelilik resýrstardyń ákimshileri de óz áreketteriniń saldaryn túsinip, aqparat taratýda eń aldymen oqyrman men qoǵam aldyndaǵy jaýapkershilikti jiti uǵynýǵa tıis, — dep jazdy vedomstvo basshysy Facebook-tegi paraqshasynda.
Mádenıet jáne aqparat mınıstri statıstıkalyq derekterdi keltirdi. Oǵan súıensek, 2023 jyldan 2024 jylǵa deıingi aralyqta Qazaqstan ınternet segmentinde anyqtalǵan zańǵa qaıshy kontent kólemi eki ese ósip, 116 354 materıalǵa jetti.
— Eń kóp taralǵan zańbuzýshylyqtar qatarynda — terrorızmdi, dinı ekstremızmdi jáne esirtki quraldaryn nasıhattaý, onlaın-kazıno men qarjy pıramıdalaryn jarnamalaý bar. Ótken jyly onlaın-platformalarda 78 539 zańǵa qaıshy materıal anyqtalyp, onyń 24,3%-y joıyldy. Dostar, kez kelgen memlekettiń turaqtylyǵyn qamtamasyz etetin basty faktorlar — aýyzbirshilik pen yntymaq. Sondyqtan bárimiz Memleket basshysy atap ótkendeı, naǵyz quqyqtyq memleket qalyptastyrýdyń basty kilti sanalatyn zań men tártip qaǵıdatyn berik ustanýymyz qajet, — dep túıindedi Balaeva.
Osyǵan deıin Aıda Balaeva mınıstrlikti sotqa bergen jýrnalıster týraly pikir bildirdi.