Elimizde týberkýlezdiń aldyn alý aılyǵy júrip jatyr

ASTANA. KAZINFORM – Jyl saıynǵy dástúrli naýqan 24 naýryz Dúnıejúzilik týberkýlezge qarsy kúres kúninde aıaqtalmaq.

Bul jóninde Astana qalasy sanıtarııalyq-epıdemıologııalyq baqylaý departamenti basshysynyń orynbasary Janna Pralıeva qalalyq kommýnıkatsııalar qyzmetinde ótken brıfıngte málimdedi.

– Týberkýlez emdeletinin atap ótken jón. Ásirese, bul aýrý erte kezinde anyqtalyp, naýqas der ýaqytynda em qabyldasa, em-dom jaqsy nátıje beredi, – dedi ol.

Maman eresekterdi flıýrografııalyq jáne profılaktıkalyq-medıtsınalyq tekseristen ótip turýǵa shaqyrdy. Al balalar oqtyn-oqtyn týberkýlındik dıagnostıkadan ótý kerektigin eske saldy.

– Ata-analardy eGov kúntizbesine sáıkes balalaryna ýaqytyly vaktsına salǵyzýǵa shaqyramyz. Sonymen qatar, turǵyndardy ýaqytyly profılaktıkalyq tekserýden ótýge shaqyramyz, – dedi J. Pralıeva.

Budan bólek ol týberkýlezdiń basty belgilerin de atap ótti: uzaq ýaqyt jótel, dene qyzýynyń kóterilýi, salmaq joǵaltý. Mundaı jaǵdaıda dereý dárigerge qaralǵan jón.

– Medıtsınalyq kómekke erte júginý tek saýyǵyp ketýińizge ǵana emes, ınfektsııany jaqyn adamdaryńyz ben aınalańyzǵa taratpaýǵa da múmkindik beredi, – dedi maman.

Sonymen birge ol aýrýdyń aldyn alý úshin salaýatty ómir saltyn ustanýǵa, jeke gıgıenany saqtaýǵa jáne ımmýnıtetti nyǵaıtýǵa keńes berdi.

Aıta keteıik buǵan deıin Qazaqstanda týberkýlezden bolatyn ólim-jitim bes ese azaıǵanyn jazǵanbyz.