Elimizde Tramadoldyń satylymy 90%-ǵa tómendedi
ASTANA. KAZINFORM – Qazaqstanda Tramadol byltyr psıhotroptyq zattardyń tizimine engizildi.
«Zań jobasynda zańsyz zattar aınalymy, ony saqtaýǵa qylmystyq jaýapkershilik kózdelgen. Medıtsınalyq preparattardy baqylaýsyz satýdyń saldarynan dárihanalarda esirtkiler paıda boldy. Olarǵa degen jastardyń qumarlyǵy kún sanap artýda. Osy oraıda Іshki ister mınıstrligine suraǵym bar, kúshti áser etetin medıtsınalyq preparattardyń joly qalaı kesilip jatyr?», - dedi Májilis depýtaty Qazybek Álishev.
«Byltyr sáýirde Tramadol dárisin tyıym salynǵan tizimge kirgizdik. Sodan keıin onyń aınalymy 90%-ǵa túsip qaldy. Buryn dárihanada Tramadoldy qolma-qol sata berse, qazir olaı emes, biz ony tekserip jatyrmyz. Al basqa da kúshti áser etetin preparattardy tyıym salynǵan tizimge engizsek, dárihanalar olardy satpaıdy dep oılaımyz», - dedi Іshki ister mınıstriniń orynbasary Aıdos Rysbaev Májilis otyrysynda saýalǵa jaýap bere otyryp.
Vıtse-mnııstrdiń aıtýynsha, dárihanalar arnaıy ruqsatpen tekseriledi.
«Biz anyqtalǵan kemshilikterdi farmatsevtıkalyq baqylaýǵa jiberemiz, olar ákimshilik hattama toltyrady. Eger qylmystyq jaza engizilse, onda bizge jumys isteý ońaıǵa túsedi», - deıdi ol.
