Elimizde sý tasqynynan zardap shekken azamattarǵa qandaı áleýmettik qoldaý kórsetilýde
ASTANA. KAZINFORM – QR Premer-Mınıstriniń orynbasary Tamara Dúısenova sý tasqynynan zardap shekken azamattardy áleýmettik qoldaý boıynsha memleket qabyldap jatqan sharalar týraly aıtty, dep habarlaıdy QR Úkimetiniń baspasóz qyzmeti.
«Memlekettiń halyq aldyndaǵy áleýmettik mindetteri tolyq ári ýaqtyly oryndalýda. Zardap shekken aımaqtardyń turǵyndaryna áleýmettik tólemder bekitilgen merzimnen buryn berilip jatyr. Mundaı rejım bıylǵy 1 qyrkúıekke deıin saqtalatyn bolady. Odan bólek, múgedektigi bar azamattardy qaıta kýálandyrý men birinshi toqsanda ataýly áleýmettik kómekti alyp júrgender úshin qaıta taǵaıyndaý merzimderi 1 shildege deıin avtomatty túrde uzartyldy», - dep atap ótti Tamara Dúısenova.
Vıtse-premer tasqynnan zardap shekken azamattardyń turǵyn úı máselesin sheshý týraly da aıtty. Sý tasqyny saldarynan úılerdi nemese saıajaılardy (jalǵyz turǵyn úıi) qalpyna keltirý múmkin bolmaı qalǵan azamattar úshin máseleni sheshýdiń eki joly usynylǵan:
jańa úı salý;
Ónerkásip jáne qurylys mınıstrligi bekitken shekti soma aıasynda azamattardyń tańdaýyna saı ekinshi naryqtan daıyn baspana satyp alý.
«Tasqyn sýdan zardap shekkenderdiń barlyǵyna 100 aılyq eseptik kórsetkish kóleminde birjolǵy tólem qarastyrylǵan. Búginde ol 11 myńnan asa otbasyǵa tólengen. Úkimet azamattarǵa búlingen úı zattaryn alý úshin qosymsha 150 AEK-ke deıingi mólsherde kómek kórsetý týraly sheshim qabyldady», — dep atap ótti Tamara Dúısenova.
Aıta keteıik, bul qosymsha kómek búlingen úı zattaryn (tońazytqysh, as úı plıtasy, ústel, oryndyq, kereýet, kir jýǵysh mashına, teledıdar nemese radıo, sýmen jabdyqtaý jáne jylytý quraldary) satyp alýdy qarjylandyrý nemese shuǵyl qajettiligi bar taýarlardy usyný túrinde kórsetiledi.
Odan bólek, ótelmegen nesıesi bar azamattarǵa bankter men mıkroqarjy uıymdary 1 sáýirden bastap 30 maýsymǵa deıingi aralyqta bereshekti óteý merzimin uzartýdy qarastyrýda. Atalǵan kezeńde zardap shekkenderge aıyppuldar men ósimpuldar eseptelmeıdi. Mundaı shara jeke kásipkerler, shaǵyn jáne orta bıznes ókilderine de usynylady. Aımaq ákimdikteri 5 myńnan asa azamattyń jáne 110-nan asa bıznes sýbektileriniń tizimin jasaǵan.
Sonymen qatar evakýatsııalyq ortalyqtarda bolǵan 4 myńnan asa bala saýyqtyrý lagerlerine, kolledjder men joǵary oqý oryndarynyń jataqhanalaryna, Nazarbaev zııatkerlik mektepteri, Bilim ınnovatsııa lıtseıleriniń ınternattaryna ornalastyryldy. Onda turýǵa, tamaqtanýǵa jáne oqýǵa qajetti jaǵdaı jasalǵan. Olar munda úıleri qalpyna keltirilip, mektepterinde oqý protsesi qaıta jalǵasqanǵa deıin bolady.
«Búginde 500-den asa bala áli de evakýatsııalyq ortalyqtarda qalyp otyr. Olar da bilim berý úrdisimen qamtylǵan. Olardyń ata-analary tasqyn sýdyń ketip, úılerine oralǵanyn nemese baspanalaryn qalpyna keltirý úshin baǵalaý júrgizilýin kútip júrgenin túsinemin. Bul sanattaǵy balalardyń ata-analaryna bizde balalardy ornalastyrýǵa qarastyrylǵan taǵy 4 myńnan asa oryn bar ekenin aıtqym keledi. Eger kelisimin berse, olardy sol jerlerge ornalastyrýǵa daıynbyz. Oqý maýsymy aıaqtalǵan soń ata-analardyń kelisimimen balalarǵa ózi turyp jatqan aımaqta, ne basqa óńirlerde ornalasqan jazǵy demalys lagerlerine barýyna múmkindik beriledi. Bul máselemen Oqý-aǵartý, joǵary bilim, týrızm jáne sport mınıstrleri tikeleı aınalysýda», — dep atap ótti Tamara Dúısenova.
Vıtse-premer sondaı-aq zardap shekken 6 aımaqtaǵy túlekter úshin ulttyq biryńǵaı test bólek kestemen ótkiziletinin jetkizdi. Talapkerler tómen ball alǵan jaǵdaıda bıylǵy jaǵdaıǵa baılanysty qańtar men naýryz aılaryndaǵy UBT-daǵy úzdik nátıje eskeriletin bolady. Odan bólek, qazir qosymsha nysanaly granttar bólý jaǵy qarastyrylyp jatyr.
Vıtse-premer barlyq medıtsınalyq mekemeler kúsheıtilgen rejımde jumys istep jatqanyn da atap ótti. Qazirde qajetti dári-dármek qory ázirlengen. Epıdemıologııalyq brıgadalar qurylyp, japa shekken aımaqtardaǵy aýyz sý sapasy men erekshe qorǵalatyn aýmaqtar turaqty baqylaýǵa alynǵan. Búginde epıdemıologııalyq jaǵdaı turaqty dep baǵalanýda.