Elimizde sý ınfraqurylymy tsıfrlyq júıege kóshedi
ASTANA. KAZINFORM — Sý sharýashylyǵy ınfraqurylymyn jańǵyrtý aıasynda eldiń ońtústik óńirlerinde jalpy uzyndyǵy 968 shaqyrym bolatyn, 65 myń gektar jerdi sýaratyn 103 ırrıgatsııalyq kanaldy avtomattandyrý jumysy bastaldy. Bul týraly vedomstvonyń baspasóz qyzmeti málim etti.
Osyǵan deıin rekonstrýktsııadan ótken, jalpy uzyndyǵy 1184 shaqyrym bolatyn 270 kanal da avtomattandyrylyp jatyr. Budan bólek, avtomattandyrý elementteri men zamanaýı sý esepteý júıelerin engizýdi qamtıtyn ırrıgatsııalyq kanaldardy rekonstrýktsııalaý boıynsha 264 jobaǵa arnalǵan jobalaý-smetalyq qujat ázirlenedi.
— Mınıstrlik tsıfrlyq quraldardy ushtastyra otyryp, sý resýrstaryn basqarýdyń keshendi, kópdeńgeıli júıesin qalyptastyrýda. Mundaı tásil ekonomıkanyń túrli salalarynyń turaqty damýyn qamtamasyz etýge, eldiń sý qaýipsizdigin nyǵaıtýǵa jáne ómirlik mańyzy bar resýrsty bolashaq urpaq úshin saqtaýǵa múmkindik beredi, — dedi Sý resýrstary jáne ırrıgatsııa mınıstri Nurjan Nurjigitov.
Búginde mınıstrlik ázirlegen Sý resýrstarynyń ulttyq aqparattyq júıesi 22 myń sý nysanyn qamtyp otyr. Onyń ishinde 17 myńnan astam ózen, 4 myńǵa jýyq kól jáne gıdrotehnıkalyq nysandardyń 60%-y bar. Jyl sońyna deıin 6 myńnan astam kanaldy tsıfrlandyrý jáne gıdrotehnıkalyq nysandardy qamtý deńgeıin 100%-ǵa jetkizý josparlanǵan.
Sonymen qatar eldiń biryńǵaı sý balansy qalyptastyrylady. Bul sý sharýashylyǵy ýchaskeleri bólinisinde naqty sý aǵynyn, sý qoımalaryndaǵy jınaq kólemin jáne sýdy tutyný deńgeıin salystyrýǵa múmkindik beredi. Gıdrotehnıkalyq qurylysjaılar men sý nysandarynyń qaýipsizdigine erekshe nazar aýdarylýda. Ǵaryshtyq monıtorıng pen gıdrobeketterdiń derekteri ıntegratsııalanyp jatyr.
Aıta keteıik, buǵan deıin únemdelgen qarjy esebinen 14 kanal betondalyp jatqanyn jazdyq.