Elimizde sábiz eksportyna shekteý qoıylmaıtyn boldy

PAVLODAR. KAZINFORM - Otandyq fermerler óz ónimderin syrtqa erkin sata alady. Bul qoımalarda jınalyp qalǵan sábizdi buzylmaı turyp satyp jiberýge múmkindik beredi.

Saýda jáne ıntegratsııa mınıstrliginiń talaby - sábiz eksportyna úsh aılyq ýaqytsha shekteý engizý týraly sheshim Úkimette ótken vedomstvoaralyq komıssııa otyrysynda qabyldanbady.

- Otandyq kókónis ósirýshilerge, sonyń ishinde Ertis-Baıan óńiriniń fermerlerine qýanyshty jańalyǵymyz bar. Sábiz eksportyna shekteý qoıylmaıtyn boldy. Saýda jáne ıntegratsııa mınıstrligi buǵan deıin el ishinde sábiz tapshylyǵy týyndap, baǵa kóterilip ketýi múmkin degen boljam jasaǵan. Biraq biz shynaıy tsıfrlardy dáıekti túrde keltirip, sharýalardyń quqyǵyn qorǵap qaldyq. Qoımalarda tonnalaǵan sábiz úıilip jatyr. Endi fermerler óz ónimderin esh alańsyz syrtqa eksporttaı beredi, - dep habarlady Májilis depýtaty Nurjan Áshimbetov.

Eske sala keteıik, buǵan deıin Ertis boıynyń fermerleri sábiz eksportyna shekteý engizbeýdi suraǵan edi. Shekteý kúshine enetin bolsa, kókónis ósirýshiler adam aıtqysyz shyǵynǵa ushyrap, qoıma toly ónimdi kúresinge laqtyrǵannan basqa amal qalmaıtynyn málimdegen. 

Al depýtat Temir Qyryqbaev Ulttyq ekonomıka mınıstri S.M. Jumanǵarınge depýtattyq saýal joldap, aýyl sharýashylyǵy ónimderi eksportyna shekteýdiń tıimdiligine kúmán keltiretinin aıtqan bolatyn.